OPEC Beynəlxalq İnkişaf Fondunun İdarəedicilər Şürası Azərbaycanda 240 MVt gücündə “Xızı-Abşeron” Külək Elektrik Stansiyasının (KES) inşası layihəsini maliyyələşdirmək üçün Səudiyyə Ərəbistanının “ACWA Power Wind” şirkətinə 50 milyon ABŞ dolları məbləğində kreditin ayrılmasını təsdiqləyib.
Bu barədə OPEC-in məlumatında bildirilir.
Kredit elektrik təchizatının yaxşılaşdırılmasına, enerji strukturunun diversifikasiyasına və karbon emissiyalarının azaldılmasını dəstəkləmək məqsədilə KES-in tikintisi üçün nəzərdə tutulub. Qeyd edək ki, ümumi qoyuluş gücü 240 MVt olan layihə Xızı rayonunun Sitalçay və Abşeron rayonunun Pirəkəşkül kəndində reallaşdırılacaqdır. OPEC Fondui ümumilikdə 18 layihə üzrə 600 milyon ABŞ dolları ayırıb.
Bu kreditlərin 376.03 milyon ABŞ dolları dövlət sektorunda 11 layihə, 225 milyon ABŞ dolları isə özəl sektor və ticarətin maliyyələşdirilməsi üzrə 7 layihə üçün ayrılıb.
O cümlədən dövlət sektoru üzrə Çinə (50 milyon ABŞ dolları), Komor adalarına (17 milyon ABŞ dolları), Liberiyaya (20 milyon ABŞ dolları), Madaqaskara (30 milyon ABŞ dolları), Malaviyaya (20 milyon ABŞ dolları), Şimali Makedoniyaya (50 milyon ABŞ dolları), Paraqvaya (50 miklyon ABŞ dolları), Seneqala (38,03 milyon ABŞ dolları), Tacikistana (10 milyon ABŞ dolları), Tanzaniyaya (41 milyon ABŞ dolları) və Türkiyəyə (50 milyon ABŞ dolları), eləcə də özəl sektor və ticarətin maliyyələşdirilməsi üzrə Azərbaycanla (50 milyon ABŞ dolları) yanaşı Ermənistana (20 milyon ABŞ dolları), Banqladeşə (30 milyon ABŞ dolları), Nepala (25 milyon ABŞ dolları), Uqandaya (25 milyon ABŞ dolları), Özbəkistana (35 milyon ABŞ dolları) və Afrika regionuna (40 milyon ABŞ dolları) kredit ayrılıb.
OPEC Fondu yeni kreditlərlə nəqliyyat, səhiyyə, təhsil və enerji sektorlarında layihələri, həmçinin beynəlxalq ticarəti dəstəkləməyi, ərzaq təhlükəsizliyini təşviq etməyi planlaşdırır.
Xatırladaq ki, OPEC Fondu 1976-cı ildə yaradılıb. Bu günə qədər OPEC Fondu 125-dən çox ölkədə dəyəri 190 milyard ABŞ dolları olan layihələrə 24 milyard ABŞ dollarından çox vəsait ayırıb.
