OpenAI 13–17 yaşlı istifadəçilər üçün nəzərdə tutulan ChatGPT for Teens versiyasını istifadəyə verib. Yeni rejim sistem istifadəçinin yaşının 18-dən aşağı olduğunu müəyyən etdikdə və ya yeniyetmə yaşını özü qeyd etdikdə avtomatik aktivləşir.
ChatGPT for Teens-ə Study Mode funksiyası inteqrasiya olunub. Bu rejim tapşırıqlara birbaşa hazır cavab vermək əvəzinə, yönləndirici suallar vasitəsilə problemi mərhələli şəkildə izah edir. Yeniyetmə birbaşa həll istədikdə çat-bot ona mövzunu özü anlamağı təklif edir. OpenAI bu funksiyanı “responsible homework reminders”, yəni məsuliyyətli ev tapşırığı xatırlatmaları adlandırır.
Bundan əlavə, istifadəçilərə testlər, riyaziyyat və təbiət elmlərinin öyrənilməsi üçün vizual izahlar, həmçinin Study Hours funksiyası təqdim olunur. Bu funksiya Study Mode-un avtomatik aktivləşəcəyi saatları əvvəlcədən təyin etməyə imkan verir.
Yeni məhsulun istifadəyə verilməsi çərçivəsində OpenAI CodeAI təşkilatı ilə tərəfdaşlıq da elan edib. Təşkilat məktəblilərə və müəllimlərə süni intellektin iş prinsiplərini daha yaxşı anlamaqda kömək edəcək.
Yeniyetmə hesablarında özünə zərərvermə, zorakılıq, qidalanma pozuntuları, təhlükəli davranışlar, seksual və qrafik məzmunla bağlı daha sərt məhdudiyyətlər standart olaraq aktivdir.
18 yaşdan aşağı istifadəçilər üçün yenilənmiş model spesifikasiyası çat-botun romantik dialoqlara girməsini, emosional bağlılığı təşviq etməsini, həmçinin özünün hisslərə və şüura malik olduğunu iddia etməsini də qadağan edir.
Ailə parametrlərini aktivləşdirən valideynlər “sakit saatlar” təyin edə, müəyyən yüksək riskli hallarda bildirişlər ala və hesabın bəzi təhlükəsizlik parametrlərini idarə edə bilərlər. Bu bildirişlər artıq qidalanma pozuntuları ilə bağlı riskli situasiyaları da əhatə edir.
Tətbiqdə həmçinin şəxsi və məxfi şəkillərin yüklənməməsi barədə xəbərdarlıqlar və istifadə zamanı mütəmadi fasilə etməyi xatırladan bildirişlər əlavə olunub.
