“OpenAI” şirkəti 18 yaşdan kiçik istifadəçilər üçün “ChatGPT”nin valideyn nəzarəti olan versiyasının istifadəyə verildiyini elan edib. Süni intellekt (AI) startapı uşaqlar və yeniyetmələr üçün təhlükəsizlik tədbirlərinin təkmilləşdirilməsi üzərində işləyir. Şirkətdən bildirilir ki, çat-botun bu versiyası sentyabrın sonunda istifadəyə veriləcək.
“Biz təhlükəsizliyi yeniyetmələrin məxfiliyindən və azadlığından üstün tuturuq. Bu, yeni və güclü texnologiyadır və hesab edirik ki, yetkinlik yaşına çatmayanların ciddi müdafiəyə ehtiyacı var”, – deyə “OpenAI”nin baş direktoru Sem Altman söyləyib.
Şirkətin təqdim etdiyi yeni nəzarət funksiyaları valideynlərə öz “ChatGPT” hesablarını yeniyetmələrin hesabları ilə e-poçt vasitəsilə əlaqələndirməyə; yeniyetmənin çat-botdan istifadə edə bilməyəcəyi saatları təyin etməyə; söndürülməsi lazım olan funksiyaları seçməyə; çat-botun reaksiyasını tənzimləməyə və yeniyetmə güclü stress yaşadıqda bildirişlər almağa imkan verəcək. Şirkət dəqiqləşdirib ki, “ChatGPT” 13 yaşdan yuxarı istifadəçilər üçün nəzərdə tutulub.
Əgər “OpenAI” müəyyən etsə ki, istifadəçi yetkinlik yaşına çatmayıb, onu avtomatik olaraq onun yaşına uyğun “ChatGPT” versiyasına yönləndirəcək. Bu versiya qrafik və seksual məzmunu bloklayır, nadir hallarda isə hüquq-mühafizə orqanlarını cəlb edə bilər. Şirkət həmçinin istifadəçinin yaşını daha dəqiq müəyyən etməyə imkan verəcək texnologiya üzərində işləyir.
