2021-ci il dövlət büdcəsində dövlət sifarişi və dövlət hesabına kadr hazırlığının maliyyələşdirilməsi və təhsil sahəsində digər tədbirlər üzrə 312,3 milyon manat proqnoza qarşı icra 311,9 milyon manat olub.
Bu, “Azərbaycan Respublikasının 2021-ci il dövlət büdcəsinin icrasına dair illik hesabat”da yer alıb.
Hesabatda qeyd edilir ki, bu xərclərdən 109,5 milyon manatı tələbələrə verilən təqaüd xərcləri, 202,4 milyon manatı isə təhsil və tibb müəssisələrində təhsil xərcləri təşkil edib.
Həmin təhsil xərclərinin daxilində 2021-ci ildə dövlət sifarişi ilə təhsilalanların təhsil haqlarının ödənilməsi ilə yanaşı, təhsil müəssisələrində (ali, orta ixtisas və peşə təhsili üzrə) ödənişli əsaslarla təhsil alması nəzərdə tutulan 13343 nəfər məcburi köçkün statuslu tələbələrin təhsil haqqı üzrə 27,2 milyon manat, Azərbaycan Respublikasının suverenliyi, ərazi bütövlüyü uğrunda həlak olmuş və ya əlil olmuş şəxslərin 2167 nəfər uşaqlarının təhsil haqqı üzrə 4,6 milyon manat, valideynlərini itirmiş və valideyn himayəsindən məhrum olmuş 1129 nəfər tələbənin təhsil haqqının ödənilməsi üzrə 2,6 milyon manat, I və II dərəcə əlilliyi olan şəxslər, habelə sağlamlıq imkanları məhdud 18 yaşınadək 760 nəfər uşaqların təhsil haqqı üzrə 1,7 milyon manat, ikitərəfli saziş və müqavilələr əsasında ölkəmizin dövlət ali təhsil müəssisələrində dövlət hesabına 48 nəfər təhsil alan əcnəbi tələbələrin təhsil haqqı üzrə isə 0,2 milyon manat xərclər olub.
2021-ci ilin dövlət büdcəsinin təhsil xərcləri bölməsindən maliyyələşən idarə və təşkilatların dövlət büdcəsindən ayrılmış təxsisatlardan başqa əlavə gördükləri iş və göstərdikləri xidmətlərdən əldə etdikləri gəlirləri hesabına maliyyələşdirilən xərcləri (büdcədənkənar xərcləri) 16,4 milyon manat təşkil edib ki, bu da 2020-ci illə müqayisədə 3,5 milyon manat və ya 27,5 faiz çoxdur.
