Təsəvvür edin ki, çox sərfəli bir təklif almısınız, lakin onu təklif edən insan sizdə güvənsizlik yaradır. Biznesdə intuisiya vacib rol oynasa da, heç də həmişə yüz faizlik nəticə vəd etmir.
Bəs gələcəkdə partnyorluq edəcəyiniz insanın etibarlılığını necə yoxlaya bilərik?
Hər şeydən öncə rahat əldə edə biləcəyiniz məlumatlardan istifadə edin. Belə mənbələrə misal olaraq mətbuatı, interneti, dövlət orqanlarındakı qeydiyyatı göstərə bilərik. Həmçinin hüquqi şəxslərin dövlət reyestrindən gələcək partnyorunuzun qeydiyyatı ilə bağlı məlumatlar, təsis sənədlərinin surətini, qeydiyyata alınmış lisenziyalar və s. barədə məlumat əldə edə bilərsiniz.
Bundan sonra şirkətin həqiqətən işlədiyi, yaxud sadəcə kağız üzərində mövcud olduğunu yoxlamaq lazımdır. Faktiki və hüquqi ünvanın üst-üstə düşməməsi sizi narahat etməməlidir. Çünki bir çox şirkətlər belə işləyir. Partnyorunuzun şirkətini ziyarət edin, oradakı atmosferi təhlil edin.
Ciddi şirkətin saytı olmalıdır. Əgər sayt mütəmadi olaraq işləyirsə, daim yenilənirsə fırıldaqçılarla işləmək riskləriniz azalır. Onların istifadə etdiyi reklam alətlərinə diqqət yetirin. Ciddi strukturlar billboardlarda, çaplı nümunələrdə və s. reklam olunur.
Əgər siz vergi orqanları, bank sahəsi və daxili işlər nazirliyi ilə əlaqəli olan təhlükəsizlik xidmətinə sahibsinizsə onlar vasitəsilə daha geniş məlumatlar əldə edə bilərsiniz. Bu zaman partnyorunuzun kriminal aləm, pul dövriyyəsi, maliyyə axını, kredit tarixçəsi və s. ilə olan məlumatları öyrənə bilərsiniz.
