Banker.az monitorinq qrupunun bugünkü araşdırma mövzusu premium seqmentə aid olan debet kartlar, kartların üstünlükləri və tarifləri haqqındadır. Premium seqment kartlar dedikdə, istifadəçisinə xüsusi imkanlar və güzəştlər təqdim edən bank kartları nəzərdə tutulur.

Bildiyiniz kimi, ölkəmizdə fəaliyyət göstərən bankların emissiya etdiyi kartlar əsasən VİSA və Mastercard beynəlxalq ödəniş sistemlərinin kartlarıdır. Hər iki ödəniş sisteminin premium seqment kartları vardır. Bəzi hallarda “Gold” və “Platinum” statuslu kartları da premium seqmentə aid edirlər. Lakin bu kartlar yüksək status kartlarıdır, premium seqment kartlar isə aşağıdakılardır:

• VİSA ödəniş sistemi – Visa Rewards və Visa İnfinite kartları
• Mastercard ödəniş sistemi – Mastercard World, Mastercard World Black Edition, Mastercard World Elite (“World” ailəsi).

Kart sahiblərinə həm ödəniş sistemi, həm də Banklar tərəfindən bir sıra üstünlük və imkanlar təqdim edilir. Bu imkanların bəziləri ilə aşağıda Sizləri tanış etmək istərdik.

• Pulsuz Səyahət sığortası
• Səhiyyə və hüquq məsləhətləri
• “Priority Pass” kartının hədiyyə olunması. Bu kart dünyada 1000-dən yuxarı hava limanlarında biznes “lounge”lara giriş imkanı verir.
• Konsyerj (şəxsi assistent) xidməti
• “Emergency Cash Disbursement” xidməti –  xarici ölkələrdə Kart itirildikdə və ya oğurlandıqda kartsız nağd vəsaitin alınması.
• Kart sahiblərinə beynəlxalq dəstək.
• Xüsusi endirimlər (Mastercard üzrə – Priceless Specials, Visa üzrə – Visa Worlds Best Offers)
• Və s.

Yəqin bizimlə razılaşarsınız ki, yuxarıda qeyd edilmiş üstünlüklər hamı üçün maraqlı deyildir. Bu səbəbdən bu kartlar məhz premium seqment müştərilər üçün nəzərdə tutulmuşdur. Azərbaycanın əksər Banklarında müvafiq kartların biri və ya bir neçəsi emmisiya edilir. Bu kartların qiymətləri haqqında Sizləri məlumatlandırmaq istərdik. Həmçinin qeyd etmək istərdik ki, bəzi hallarda kartı əldə etmək üçün ilkin mədaxil tələbi də mövcuddur.