Qırğızıstan prezidenti Sadır Japarov öz evini daha yaxşı mənzil şəraitinə ehtiyacı olan insanlara verib və bütün varlı vətəndaşları ondan nümunə götürməyə çağırıb.
Banker.az xəbər verir ki, prezidentin ailəsi ilə birlikdə yaşadığı ikimərtəbəli bina hazırda Dövlət İpoteka Şirkətinin tərkibinə daxildir.
Japarovlar ailəsi bu binanı hələ 2005-ci ildə alıb. 2010-cu illərdən bəri orada uşaq bağçası yerləşir.
“Bu aksiya ilə maddi imkanı yüksək olan vətəndaşları mənzilə ehtiyacı olanlarla kömək etməyə çağırmaq istərdik. Bununla əlaqədar olaraq, ipoteka krediti proqramının dəyişdirilməsinə qərar verdik”, – deyə Sadır Japarov qeyd edib.
Prezidentin sözlərinə görə, korrupsiyaya qarşı mübarizə Qırğızıstanda mənzil probleminin həllinə də kömək edəcək. Rüşvətxor məmurların ehtiyacı olan vətəndaşların xeyrinə əmlakı müsadirə ediləcək.
Xatırladaq ki, daha əvvəl Qırğızıstanda yeni ipoteka proqramı işə salınıb. Onun çərçivəsində dövlət sektorunun işçilərinə hazır mənzil alışı üçün illik 4%-lə kredit verilir.
