Yəməndəki “Ənsar Allah” hərəkatının husilərinin bölgədə mülki gəmilərə hücumlarından sonra Qırmızı dənizin cənub hissəsi ilə daşınan yüklərin sığorta dəyəri iki dəfə artıb. Bu barədə Reuters agentliyi mənbələrə istinadən məlumat yayıb.
Agentliyin qeyd etdiyi kimi, hərbi risklərin sığortası üzrə tariflərin artırılması hər bir reysin xərclərini yüz minlərlə ABŞ dolları artıracaq.
Cümə axşamı husilər Səudiyyə Ərəbistanına tətbiq etdiklərini bildirdikləri dəniz blokadasını pozduğunu iddia etdikləri Encelia və Layla neft tankerlərinə hücum etdiklərini açıqlayıblar. Hücum zamanı raketlər və pilotsuz uçuş aparatlarından istifadə olunub. Encelia tankerinə edilən zərbə nəticəsində gəminin burun hissəsində yanğın baş verib.
Bundan bir neçə gün əvvəl husilər Səudiyyə Ərəbistanına qarşı dəniz blokadası tətbiq etdiklərini elan edərək krallığı uzun illər ərzində Yəmənin milli sərvətlərini, xüsusilə neft ehtiyatlarını talamaqda ittiham etmişdilər.
Ər-Riyadın rəhbərlik etdiyi ərəb koalisiyası isə iyulun 21-də ticarət gəmilərinin mühafizəsi üzrə tədbirlərin həyata keçirilməsinə başladığını açıqlayıb.
