“Revolut” fintex-startapı “Stays” adlı hotellərin bron edilməsi xidmətini işə salıb.
Banker.az bu barədə xarici KİV-ə istinadən xəbər verir.
Bu, şirkətin ilk qeyri-maliyyə xidmətidir. “Revolut” gələcəkdə həmçinin aviabiletlərin alışı, avtomobillərin icarəsi və səyahət üçün digər xidmətləri inkişaf etdirməyi planlaşdırır.
Bildirildiyi kimi, “Revolut” müştəriləri “Stays” vasitəsilə hotel bron etdikdə 10%-dək keşbek qazana bilərlər. Yeni funksiya İngiltərədə 20 iyul tarixində işə salınıb, yaxın aylarda Avropa və ABŞ-da da təqdim edilməsi planlaşdırılır.
Xatırladaq ki, “Revolut” 2014-cü ildə Nikolay Storonski və Vlad Yasenko tərəfindən yaradılıb. Xidmət Böyük Britaniya və Avropada fəaliyyət göstərir. “Revolut” tətbiqi və kartını müxtəlif valyutalarda bir neçə hesaba bağlamaq mümkündür.
2021-ci ilin iyulunda xidmət 33 milyard dollar qiymətləndirmə ilə 800 milyon dollar cəlb edib.
