Cümə axşamı “Samsung Electronics”in səhmləri yeni rekord maksimum səviyyəyə çatıb. Buna səbəb yerli KİV-lərin şirkətin süni intellekt üçün nəzərdə tutulmuş ən yeni yaddaş çipi üzrə qiymətlərlə bağlı danışıqlar apardığını və bu çipin əvvəlki nəsildən 30% baha olacağı barədə məlumat yayması olub.
Koreya birjasında mikrosxem istehsalçısının səhmləri üç günlük bayramlardan sonra ticarətin bərpası ilə 5,4% artıb. “Chosun Ilbo” nəşrinin məlumatına görə, “Samsung” HBM4 yaddaşının qiymətini təxminən bir ədəd üçün 700 dollar səviyyəsində müəyyən etməyi planlaşdırır. Şirkət bu məlumatı şərh etməkdən imtina edib.
Səhmlərin artımı süni intellektin biznesə təsiri ilə bağlı narahatlıqların azalması və sənayenin davamlı inkişafı fonunda baş verir. Çərşənbə günü “Samsung”un müştərisi olan “Nvidia” “Meta Platforms”un yaxın illərdə süni intellekt üçün “milyonlarla” prosessor yerləşdirməyə razılaşdığı xəbərlərindən sonra əlavə dəstək alıb. Bu arada “Apple” da süni intellekt texnologiyalarına əsaslanan üç yeni geyilə bilən cihazın hazırlanmasını sürətləndirir.
“Saxo Markets”in baş investisiya strateqi Çaru Çanana bildirib ki, “Samsung”un HBM4 ilə bağlı hesabatı sənayenin “qiymət gücünü” vurğulayır. Onun sözlərinə görə, bu, süni intellekt yaddaş bazarının hələ də gərgin qaldığını və Samsung-un premium seqmentdə təsirini bərpa etdiyini göstərir.
Yaddaş mikrosxemlərinin çatışmazlığı “Samsung” və “SK Hynix” kimi şirkətləri dəstəkləyib və bu, Cənubi Koreyanın Kospi indeksinin cari ildə 34% artmasına səbəb olub, onu dünyanın ən uğurlu fond bazarına çevirib.
“SK Hynix” süni intellekt sahəsində liderlik uğrunda yarışın ilkin mərhələlərində Samsung-u qabaqladıqdan sonra, sonuncu mövqelərini bərpa etməyə başlayıb. Ötən həftə Samsung HBM4 çiplərinin kütləvi istehsalına və müştərilərə kommersiya partiyalarının göndərilməsinə başladığını elan edib.
“Chosun Ilbo” sənaye mənbələrinə istinadən bildirib ki, “SK Hynix” avqust ayında “Nvidia” üçün HBM4 yaddaşının qiymətini təxminən 500 dollar səviyyəsində müəyyən edib. Lakin şirkət bu qiyməti “Samsung”un təklif etdiyi səviyyəyə endirə bilər.
“Bloomberg Intelligence” analitiki Masahiro Vakasugi qeyd edib ki, 700 dollarlıq qiymət “Samsung”un HBM4 üzrə əməliyyat mənfəətinin 50–60% olacağını göstərir. Onun sözlərinə görə, əgər “Samsung” “Nvidia”ya HBM çiplərinin tədarükünü artırarsa, 2026-cı ilə qədər “Samsung” və “SK Hynix”in orta qiymətləri arasındakı fərq azalacaq.
