“Fast fashion” seqmentində fəaliyyət göstərən onlayn pərakəndə şirkət Shein Honkonqda planlaşdırılan IPO zamanı təxminən 25 milyard dollar qiymətləndirmə əldə etməyi gözləyir. Reuters mənbələrə istinadən yazır ki, bu, şirkətin dörd il əvvəl səhm satışı zamanı əldə etdiyi təxminən 100 milyard dollarlıq qiymətləndirmənin cəmi dörddə birinə bərabərdir.
Məsələ ilə tanış olan iki mənbə Shein-in IPO zamanı təxminən 25 milyard dollar dəyərləndiriləcəyini bildirib. Üçüncü mənbənin sözlərinə görə isə şirkət yerləşdirmə qiymət diapazonundan asılı olaraq 25–28 milyard dollar aralığında qiymətləndirməni nəzərdən keçirir. Şirkətin planları ilə birbaşa tanış olan dördüncü mənbə bildirib ki, Shein IPO zamanı ümumi səhmlərinin 8%-nə qədərini bazara çıxarmağı planlaşdırır. 25 milyard dollarlıq qiymətləndirmə yerləşdirmənin həcminin 2 milyard dollara qədər ola biləcəyini göstərir.
Shein-in 2025-ci ildə xalis mənfəəti 2,06 milyard dollar olub. Bu baxımdan 25 milyard dollarlıq qiymətləndirmə investorların şirkəti illik mənfəətinin təxminən 12 misli səviyyəsində dəyərləndirdiyi anlamına gəlir.
Shein-in qiymətləndirməsinin kəskin şəkildə aşağı düşməsi şirkətə investor marağının necə zəiflədiyini göstərir. Buna artım tempinin yavaşıması, daha yüksək ticarət xərcləri, tənzimləyici nəzarətin sərtləşməsi və rəqabətin güclənməsi təsir edib.
Shein-in xalis gəliri 2023-cü ildə 41,1%, 2024-cü ildə isə 20,7% artıb. Lakin ötən il artım tempi cəmi 8%-ə qədər zəifləyib və ümumi gəlir 41,8 milyard dollar təşkil edib. Bu ilin birinci rübündə isə gəlir cəmi 1,1% artıb. Buna ötən ilin mayından tətbiq olunan ABŞ gömrük rüsumları və tarifləri təsir edib.
