®Rəqəmsal İnkişaf və Nəqliyyat Nazirliyinin tabeliyində olan “AzInTelecom” MMC tərəfindən yaradılan SİMA yeni nəsil rəqəmsal imza sığorta sahəsində tərəfdaş çevrəsini genişləndirməyə davam edir.
SİMA rəqəmsal imza artıq “Meqa Həyat Sığorta” ASC ilə inteqrasiya prosesini yekunlaşdırıb. İndi vətəndaşlar sığorta şirkətinin portalında qeydiyyatdan keçdikdən sonra şəxsi kabinet vasitəsilə Həyatın Yaşam Sığortası üzrə müraciət edərkən “Fiziki şəxslərin vergi rezidentliyinin müəyyən edilməsi üçün özünüqiymətləndirmə anketi”ni (FATCA/CRS) SİMA vasitəsilə rahat və çevik şəkildə imzalaya biləcəklər.
SİMA ilə inteqrasiyadan əvvəl vətəndaşlar anketi kağız daşıyıcıda əllə doldururdular. “Meqa Həyat Sığorta” şirkəti vətəndaşlara təqdim etdiyi bu xidməti indi SİMA yeni nəsil rəqəmsal imza ilə elektronlaşdırıb.
Artıq sənədin SİMA vasitəsilə imzalanması vətəndaşların vaxtına, tərəfdaşların isə xərclərinə qənaət etməsinə xidmət edəcək.
Qeyd edək ki, SİMA ilə “Meqa Həyat Sığorta” ASC-nin digər xidmətlər üzrə inteqrasiya prosesi davam etdirilir. Növbəti mərhələdə “Kredit həyat sığortası” məhsulu üzrə müraciətlərin SİMA ilə həyata keçirilməsi nəzərdə tutulur.
SİMA yeni nəsil rəqəmsal imzanın həm vətəndaşlar, həm də xidmət təklif edənlər üçün bir sıra üstünlükləri var. Maliyyə xərclərinin azaldılması və vaxt itkisinin qarşısının alınması isə hər iki seqment üzrə xüsusi üstünlüklər yaradır. Bundan əlavə, SİMA-nın istənilən sistemə inteqrasiya oluna bilməsi, eləcə də avtomatlaşdırma istifadəçilər üçün sürətli və istənilən sayda imzalama imkanı da qazandırır.
Mobil tətbiqlə işləyən imzanı əldə etmək üçün SİMA tətbiqini mobil cihaza yükləmək və bir dəfə qeydiyyatdan keçmək kifayətdir. Rəqəmsal xidmətlərə əlçatanlığı artıran imzanın ölkəmizdə biznes proseslərini sürətləndirəcəyi gözlənilir.
SİMA rəqəmsal imza ilə bağlı daha ətraflı məlumatı “AzInTelecom”un rəsmi saytından və “157” Zəng Mərkəzi ilə əlaqə saxlayaraq əldə edə bilərsiniz.
