10 il əvvəl Melani Alder və Devid Rayt evlərinin qonaq otağından işləyərək internetdə soyuducu maqnitləri satırdılar. Bu gün onlar Yuta ştatının ən gənc milyarder ər-arvadıdır.
19 sentyabr 2025-ci ildə elektron ticarət sahəsində fəaliyyət göstərən Pattern şirkətinin həmtəsisçiləri Devid Rayt və Melani Alder birlikdə Tayms-skverdəki Nasdaq səhnəsinə çıxdılar. Hər ikisi qara köynək və xüsusi hazırlanmış mavi-bənövşəyi Nike Air Force idman ayaqqabıları geyinmişdi. Yuta ştatının Lehay şəhərində yerləşən şirkətin baş direktoru Rayt əməkdaşlarla dolu zalda mikrofona yaxınlaşaraq təşəkkür etdi. “Məndən və Meldən tez-tez soruşurlar ki, buna necə nail olduq. Amma biz bunu tək etməmişik… bu, komanda işinin nəticəsidir”, — deyə Rayt ayaqqabısını çıxarıb həvəslə başı üzərinə qaldıraraq bildirib.
Nasdaq zəngini çalmaq Rayt və Alder üçün həqiqətən inanılmaz an idi. 2013-cü ildə Alderin evinin qonaq otağından Amazon-da soyuducu maqnitləri satmağa başlayanda onlar belə bir gələcəyi təsəvvür belə etmirdilər. “Sadəcə bir qədər əlavə pul qazanmağa çalışırdıq”, — deyə Rayt Pattern-in Yutanın texnologiya klasteri Silicon Slopes-də yerləşən qərargahının konfrans zalında danışır. Pəncərələrdən Yuta dağları görünür. Yanında oturan Alder əlavə edir: “Bəli, başlanğıcda sadəcə ailələrimizi dolandırmağa çalışırdıq”. O dövrdə onların ailə vəziyyəti indikindən fərqli idi: Alder artıq keçmiş həyat yoldaşı olan əri ilə dörd uşaq böyüdürdü, Raytın isə indiki keçmiş həyat yoldaşından altı övladı vardı.
Bu gün onların pul barədə narahat olmasına ehtiyac yoxdur. Sentyabrdakı IPO-dan sonra Pattern səhmlərinin qiyməti təxminən iki dəfə artıb, martda başlayan dörd aylıq yüksəliş isə şirkətin bazar kapitallaşmasını 4 milyard dollardan yuxarı qaldırıb. İyulda Pattern səhmləri rekord 29 dollara çatanda baş direktor Raytın sərvəti 1,7 milyard dollar, strategiya direktoru Alderin sərvəti isə 1,1 milyard dollar qiymətləndirilirdi. O vaxtdan səhmlər ucuzlaşsa da, avqustun 7-nə olan məlumata görə, şirkətin 55%-nə sahib olan cütlüyün səhm paketinin ümumi dəyəri 2,2 milyard dollar təşkil edir. Bundan əlavə, onlar IPO-dan qısa müddət sonra səhmlərinin bir hissəsini sataraq təxminən 90 milyon dollar nağd vəsait əldə ediblər.
2018-ci ildə evlənən cütlük birlikdə 10 övlad böyüdür. Maraqlıdır ki, Raytın qızı ilə Alderin oğlu valideynlərinin toyundan qısa müddət sonra görüşməyə başlayıblar və indi özləri də evlidirlər.
Keçmiş reseller və Amazon bazarının araşdırılması üzrə ixtisaslaşan SmartScout şirkətinin təsisçisi Skott Nidhem deyir ki, Pattern-in biznesinin mahiyyəti istehlak brendlərini Amazon kimi gəlirli, amma son dərəcə mürəkkəb onlayn platformaların bütün çətinliklərindən azad etməkdir. Pattern brendlərin məhsullarını topdansatış qaydasında alır, internet mağazalarının yaradılmasından çatdırılmanın təşkilinə qədər bütün satış prosesini öz üzərinə götürür və məhsulları Amazon, TikTok Shop, Walmart və Cənubi Koreyanın Coupang platforması da daxil olmaqla 70-dən çox ticarət meydançasında əlavə marja ilə sataraq gəlir əldə edir.
İllər ərzində Pattern xidmətlərini genişləndirərək məlumat analitikası və süni intellekt əsasında əlavə texnoloji həllər yaradıb. Şirkət Panasonic, SkullCandy və Spanx da daxil olmaqla 200-dən çox brendə məhsullarını daha effektiv satmağa kömək edir.
Məsələn, ağız yaxalayıcıları istehsal edən SmartMouth Amazon-da zəif satış göstəriciləri ilə üzləşəndə Pattern-ə müraciət edib. Şirkət Amazon-da satılan bütün oxşar məhsulların qiymətlərini təhlil edib və SmartMouth üçün yeni qiymət təklif edib: rəqiblərlə müqayisədə mövqeyini yaxşılaşdıracaq qədər aşağı, amma mənfəətə zərər vurmayacaq səviyyədə.
Daha sonra SmartMouth məhsullarının foto və videoları Pattern-in süni intellekt əsaslı proqram təminatına yüklənib. Sistem bir neçə reklam kampaniyasını avtomatlaşdırmağa və axtarış alqoritmləri üçün xüsusi optimallaşdırılmış məhsul təsvirləri yaratmağa kömək edib. Bütün bu iş rəqiblərin reklamları və vitrinləri haqqında məlumatlara, eləcə də Pattern-in Amazon-da onillik satış fəaliyyəti ərzində topladığı geniş daxili məlumat bazasına əsaslanıb. Üç il sonra SmartMouth Amazon-u özünün ən böyük satış kanalı adlandırıb.
Pattern-in strategiyası IPO-dan bəri gəlirin hər rüb 40%-dən çox artmasına kömək edib. Ötən il şirkətin gəliri 2,5 milyard dollara çatıb ki, bu da 2024-cü illə müqayisədə 39% çoxdur. 2026-cı ilin ilk yarısında isə gəlir artıq 1,6 milyard dollar təşkil edib.
Bununla belə, topdansatış alışları, çatdırılma və məhsulların geri qaytarılması ilə bağlı yüksək xərclər Pattern-in maliyyə göstəricilərini sürətlə böyüyən texnologiya şirkətindən daha çox geyim pərakəndəçisi və ya restoran şəbəkəsinə bənzədir. IPO ilə əlaqəli birdəfəlik xərclər səbəbindən ötən il xalis mənfəət cəmi 16 milyon dollar olub. 2026-cı ilin ilk yarısında da xalis mənfəət nisbətən aşağı səviyyədə qalaraq 56 milyon dollar təşkil edib — bu, gəlirin cəmi 3%-nə bərabərdir.
Biznesin kapitaltutumlu olmasına baxmayaraq, Pattern rüblük mənfəət üzrə proqnozları müntəzəm olaraq üstələyir və getdikcə daha çox diqqət cəlb edir. Proqram təminatı bazarı analitiklərinin fikrincə, məhz bu amil əvvəllər az tanınan şirkətin açıq bazar investorlarının diqqətini çəkməsinə və martdan etibarən səhmlərinin qiymətinin iki dəfə artmasına kömək edib.
Martda həmçinin IPO-dan sonra əməkdaşların və özəl investorların səhmlərini sata bilmədiyi altı aylıq lokap dövrü başa çatıb. Bundan sonra açıq bazarda alınması mümkün olan səhmlərin sayı artıb.
Səhmlərin kəskin bahalaşması sayəsində Pattern Yuta ştatının mənzərəli Silicon Slopes regionunun ən bahalı şirkətlərindən birinə çevrilib. Burada Qualtrics kimi texnologiya şirkətləri də yerləşir. Sorğu məlumatlarının analizi üçün proqram təminatı hazırlayan Qualtrics 2023-cü ildə 12,5 milyard dollara, genetik test xidməti Ancestry.com isə 2020-ci ildə 4,7 milyard dollara satın alınıb. Raytın planları reallaşarsa, Pattern bir gün Yutanın ən bahalı şirkətinə çevriləcək.
Rayt Yutada daşınmaz əmlak qiymətləndiricisi olan ata və ibtidai məktəb müəllimi olan ananın ailəsində beş bacı-qardaşı ilə birlikdə böyüyüb. Alder isə Nevada ştatındandır və yeddi bacı-qardaş arasında böyüyüb. Onun atası dövlət sektorunda ildə cəmi 45 min dollar maaşla işləyərək bütün ailəni dolandırıb, anası isə ev və uşaqların tərbiyəsi ilə məşğul olub.
Həm Rayt, həm də Alder Yutanın Provo şəhərində yerləşən Brigham Young Universitetinə daxil olublar. Mənbədə qeyd olunur ki, universitet Rusiyada “arzuolunmaz təşkilat” elan edilib. Onların yolları həyatlarının müxtəlif mərhələlərində təsadüfən kəsişsə də, əsl tanışlıq Alderin o vaxtkı həyat yoldaşı Skott Kit onları bir-birinə təqdim edəndə baş verib.
Kit və Rayt uşaqlıqdan tanış idilər: bir-birindən cəmi iki ev aralı yaşayır, eyni universitetdə təhsil alır və eyni vaxtda İsa Məsihin Sonuncu Gün Müqəddəsləri Kilsəsində işləyirdilər. Onları tanıyan mənbə deyir: “Deyv Skotta baxıb örnək götürürdü. Deyəsən, Skott ondan bir yaş böyük idi. Gəncliyində kross qaçışı komandasında əsl ulduz idi. Deyv ona heyran idi”.
Təxminən 2011-ci ildə hər iki ailə əlavə gəlir əldə etmək üçün daşınmaz əmlakla məşğul olurdu. Kit Raytın bəzi obyektlərini satmaq üçün köməkçi axtardığını öyrənəndə onu o vaxtkı həyat yoldaşı Alder ilə tanış edib. Sonrakı bir neçə il ərzində Rayt Alderin biznes bacarıqlarını öz gözləri ilə görüb.
“Bazara hansısa obyekt çıxan kimi o, artıq həmin evin qapısında olurdu”, — deyə Rayt xatırlayır. “İstədiyini əldə etməyə imkan verən həqiqi inandırma qabiliyyəti var”.
Məhz buna görə Rayt əmisi oğlunun həyat yoldaşının internetdə uşaq saç lentlərini yenidən sataraq 2 milyon dollar qazandığını eşidəndə oxşar biznesə rəhbərlik etmək üçün dərhal Alderə müraciət edib. 2013-cü ilin yanvarında uşaqlarla evdə qalan Alder razılaşıb və dərhal işə başlayıb. Həmin vaxt Kit Adobe-da konsaltinq meneceri kimi tam ştat işləyirdi.
Soyuducu maqnitləri ilə başlayan biznes tezliklə qida əlavələri, losyonlar, efir yağları və əllərinə keçən demək olar ki, istənilən məhsula qədər genişləndi. Məhsullar topdansatış qaydasında Alderin evinə gətirilir, elə qonaq otağında qablaşdırılır və alıcılara göndərilirdi. Alder gündəlik əməliyyatlara rəhbərlik edir, Rayt isə kilsədə məlumat analitiki kimi əsas işindən sonra biznesin əsasən texniki tərəfinə kömək edirdi.
“Mən işdən çıxmağa risk etmədim, çünki bunun alınacağına əmin deyildim”, — deyə Rayt etiraf edir. “2013-dən 2015-ci ilə qədər biznesə o rəhbərlik edib. Düzünü desəm, şirkətlərin ya ayaqda qalması, ya da batması məhz ilk iki ildə müəyyən olunur”.
2015-ci ilə qədər o vaxt iServe adlanan şirkət sürətlə inkişaf etməyə başladı və qida əlavələri istehsalçısı Thorne-un məhsullarının eksklüziv distribusiyası üzrə ilk müqaviləsini imzaladı. Biznes sabit şəkildə mənfəət gətirməyə başladı və həmtəsisçilər ilk gəlirlərini əldə etdilər. Rayt və texniki direktor vəzifəsini tutan həmkarı Ceyson Uells əsas işlərindən ayrılaraq tamamilə iServe-ə fokuslandılar.
Alderin keçmiş əri Kitin xatirələrinə görə, elə həmin il Rayt və Alder nəzərəçarpacaq dərəcədə daha çox vaxt keçirməyə başladılar.
Alder və Raytın sözlərinə görə, təxminən həmin dövrdə onların hər biri boşanmaq haqqında düşünməyə başlayıb. Hər ikisi nikahlarında bir-biri ilə əlaqəsi olmayan səbəblərə görə bədbəxt olduqlarını bildirirlər. Kit isə 2015-ci ildə Alderin Rayta qarşı hisslərinin gücləndiyini ona etiraf etdiyini deyir.
Kit Alder və Raytın rəsmi boşanmalardan əvvəl tam romantik münasibətə başladığını düşünmür, amma onların yaxınlaşmasının onun boşanmaq qərarına təsir edən amillərdən biri olduğunu bildirir. Raytın keçmiş həyat yoldaşı şərh verməkdən imtina edib.
Mormon ailəsində böyüyən Alder hələ 2009-cu ildə kilsədən ayrılmaq qərarı vermişdi. Onun sözlərinə görə, Rayt da kilsədən çıxandan sonra onunla romantik münasibət ehtimalını düşünməyə başlayıb. Rayt bu addımı 2016-cı ildə boşandıqdan demək olar dərhal sonra atıb və həmin ilin sonunda Alderə ilk görüş təklif edib.
“Məlumatlara aludə olan iki insan dinlə üz-üzə gəldi və o qədər sualımız yarandı ki, fikrimcə, sadəcə həmin yoldan çıxdıq”, — deyə Rayt etiraf edir.
Alder əlavə edir: “Düzünü desəm, düşünürəm ki, münasibətlərimizin qapısı məhz o zaman açıldı. Baxışlarımızın üst-üstə düşməsi mənim üçün çox vacibdir”.
2018-ci ilin əvvəlində, ilk görüşlərindən iki ildən də az müddət sonra onlar evləndilər. Elə həmin il şirkətin adı Pattern olaraq dəyişdirildi, Silicon Slopes-də qərargah açıldı və Yutadan kənarda anbarların tikintisinə başlanaraq biznesin fəal genişləndirilməsinə start verildi.
Yeddi il biznesi xarici kapital olmadan inkişaf etdirdikdən sonra Pattern 2020-ci ildə ilk dəfə iki maliyyələşdirmə raundunda ümumilikdə 277 milyon dollar xarici investisiya cəlb etdi. Nəticədə şirkət 2 milyard dollar qiymətləndirildi. Cəlb olunan kapital məhsul alışlarına, beynəlxalq genişlənməyə və xidmətlərə tələbat artdıqca işçi sayının çoxaldılmasına yönəldildi.
2022-ci ilin sonuna qədər Pattern-in əməkdaşlarının sayı 1400 nəfərə çatdı. Şirkət Sinqapur və Hindistanda iki yeni ofis açdı, illik satış dövriyyəsi isə 1 milyard dollara yüksəldi.
2022-ci ildə Pattern-in 2020-ci ildə yeni biznes strategiyası çərçivəsində satın aldığı dəriyə qulluq məhsulları brendinin təsisçisi şirkətə qarşı məhkəmə iddiası qaldırdı. O, kişi rəhbərlərin onun komandasındakı qadın əməkdaşlara qarşı seksist davranış nümayiş etdirdiyini iddia edirdi.
Pattern ittihamları rədd etdi və qarşılıqlı iddia qaldıraraq brendin təsisçisinin sövdələşmədən əvvəl öz biznesinin rentabelliyi barədə şirkəti yanıltmaqda günahlandırdı. Pattern nümayəndəsi Forbes USA-ya bildirib ki, 2024-cü ildə tərəflər hər iki iddianı təqsiri etiraf etmədən razılaşma yolu ilə həll ediblər.
Bununla belə, təhlükəsizlik səbəbindən anonim danışan bir neçə keçmiş Pattern əməkdaşının sözlərinə görə, seksist davranışla bağlı ittihamlar onlar üçün sürpriz olmayıb. Üç keçmiş əməkdaş kişi rəhbərlərin ümumi toplantılar zamanı qadın əməkdaşlara qışqırdığı və əsəbiləşdiyi ayrı-ayrı hallardan danışıb. Belə hadisələrdən birinin ötən il baş verdiyi bildirilir.
Son illərdə Glassdoor iş axtarışı platformasında dərc edilən anonim rəylərdə də oxşar fikirlər yer alıb. Rəylərdən birində şirkətin “bir növ köhnə dostlar klubuna” bənzədiyi və qadınların bəzən qəsdən olmasa belə, kənarlaşdırıldığı və təcrid edildiyi qeyd olunur. Daha sərt rəydə isə belə deyilir: “Əgər evli deyilsinizsə və Brigham Young Universitetinin məzunu deyilsinizsə, bu şirkətdə sizin üçün yer yoxdur”.
Karyeralarının böyük hissəsini Yutadakı ofisdə keçirmiş iki keçmiş qadın əməkdaşın sözlərinə görə, onların fikrincə, bu cür hörmətsiz davranış “Yutanın qapalı icması” üçün “xüsusilə qeyri-adi və ya dəhşətli bir şey” deyildi. Onlar bunu ştat əhalisi arasında mormonların yüksək payı və sərt gender rolları ilə əlaqələndirirlər. Onların fikrincə, bu, qadınların tez-tez nəzərə alınmadığı, kiçildildiyi və təcrid olunduğu iş atmosferinə səbəb olur.
“Pattern bu cür məsələlərə ciddi yanaşır”, — deyə şirkət nümayəndəsi Forbes USA-ya bildirib. “Şirkət əməkdaşlara anonim kanallar da daxil olmaqla müraciət imkanları təqdim edir, daxil olan şikayətləri ətraflı araşdırır və araşdırmanın nəticələrinə əsasən tədbirlər görür”.
Məhkəmə mübahisəsinin həll edildiyi vaxta qədər Pattern xarici müştərilərdən tam asılı olmaq əvəzinə öz brendlərini yaratmaq üzrə qısamüddətli strategiyasından tamamilə imtina etmişdi. Nəticədə həmin plan üçün cəlb olunan və ya işə götürülən əməkdaşların bir hissəsi ixtisara düşdü, digərləri isə başqa bölmələrə keçirildi.
Pattern-in strategiyası sürətlə və keçmiş əməkdaşların iddiasına görə, bəzən Raytın şəxsi qərarları ilə dəyişirdi. Bir neçə bölmə keçmiş işçilərin “kəskin kurs dəyişikliyi” kimi təsvir etdiyi proseslərdən keçib. Şirkət daxilində bunlar “restrukturizasiya” adlandırılırdı və qəfil işdən çıxarmalarla müşayiət olunurdu.
İxtisara düşmüş iki keçmiş rəhbərin sözlərinə görə, 2024-cü il ərzində şirkətin beş top-meneceri Pattern-dən ayrılıb: bəziləri ixtisar olunub, digərləri öz istəyi ilə gedib. Onlar həmçinin xatırlayırlar ki, Rayt qeyd-şərtsiz loyallıq tələb edirdi və xüsusən şirkətin texnoloji inkişafı ilə bağlı məsələlərdə kimsənin onunla razılaşmadığını düşündükdə həmin şəxsi işdən çıxarmaqda gecikmirdi.
Hazırda şirkətin yüksək rəhbərliyindəki 11 vəzifədən beşini Pattern-də iki ildən az işləyən insanlar tutur. Keçmiş əməkdaşlardan biri bunu belə ifadə edib: “Deyvin dediyini et, yoxsa get”.
İxtisar olunmuş keçmiş rəhbərlərdən biri isə deyib: “Deyv boş yerə uğur qazanmayıb. O, heç də axmaq deyil və ətrafında özünə sadiq insanlardan ibarət komanda qurub”.
Pattern nümayəndəsi işdən çıxarmaların qəfil olması və “restrukturizasiya” terminindən onların həqiqi xarakterini gizlətmək üçün istifadə edilməsi barədə iddiaları rədd edib.
“Ən vacib məsələ odur ki, qərar qəbul ediləndən sonra bütün komanda razılaşdırılmış şəkildə hərəkət edir. Bu, konkret bir şəxsə deyil, işə bağlılığın göstəricisidir”, — deyə Rayt Forbes USA-nın sorğusuna cavabında yazıb. “Şirkətdə kadr qərarları kiminsə mənimlə razılaşıb-razılaşmamasına görə deyil, effektivlik və nəticələrə əsasən qəbul edilir”.
Bu arada Alder öz sözlərinə görə, bir neçə il əvvəl şirkətin gündəlik idarəçiliyindən uzaqlaşmağa başlayıb. O, 2018-ci ildə əməliyyat direktoru vəzifəsindən strategiya direktoru vəzifəsinə keçib. Aşağı vəzifələrdə çalışmış bir çox keçmiş əməkdaş onu çox nadir hallarda gördüklərini bildirirlər.
Bununla yanaşı, bir neçə keçmiş top-menecer hesab edir ki, Alder Rayta əsas məsələlər, o cümlədən kadr qərarları üzrə məsləhətlər verirdi, çünki ər-arvad tez-tez evdə iş məsələlərini müzakirə edirdilər. Bir çoxları ofisdə Raytın qərarlarına məhz Alderin ciddi təsir göstərdiyinə inanırlar.
Keçmiş rəhbərlərdən biri deyib: “O, demək olar ki, Alderə sitayiş edir”.
Rayt və Alder Pattern-i Yutadan başqa yerdə qurmağı təsəvvür edə bilmədiklərini deyirlər. “Burada əmək etikası həqiqətən müstəsnadır. İnsanlar çox məqsədyönlüdürlər və kiçik yaşlardan sərt intizam ruhunda böyüyürlər”, — deyə Rayt bildirir. O, həmçinin ştatın vergi baxımından əlverişli şəraitini vurğulayır. “Mühafizəkar mədəniyyət bir çox cəhətdən biznesin inkişafına kömək edir”.
Onun sözlərini statistik göstəricilər də müəyyən qədər dəstəkləyir. Bu il U.S. News & World Report Yutanı rekord olaraq ardıcıl dördüncü dəfə ABŞ-nin ümumi reytinqində ən yaxşı ştatı seçib. Nəşr ştatın iqtisadi artımını, geniş imkanlarını, o cümlədən inkişaf edən texnologiya sektorunu, ictimai infrastrukturu və təhsil sistemini xüsusi qeyd edib.
Bununla belə, Yuta hələ də ABŞ-nin gəlirlərinə görə 500 ən böyük açıq şirkətinin siyahısında təmsil olunmur. Bu fakt Raytı həm təəccübləndirir, həm də motivasiya edir. O əmindir ki, Pattern həmin məqsədə doğru gedir.
Amma 2025-ci ilin dekabrında maliyyə bülleteni The Bear Cave-in tənqidçiləri şirkətin buna nail ola bilməyəcəyini iddia etmişdilər. Hesabatda Pattern-in Amazon-dan həddən artıq asılı olması qeyd olunurdu: ötən il şirkətin gəlirinin 93%-i məhz Amazon-un payına düşüb. Bundan başqa, alışların 69%-ni qida əlavələrinin təşkil etməsi və Amazon ekosistemində keçmişdə iflasa uğramış akselerator və aqreqatorların nümunələri vurğulanırdı.
Bunlardan biri Pharmapacks idi. Şirkət 2022-ci ildə müflis olana qədər gəlirlərində ciddi artım göstərmişdi.
The Bear Cave hesabatının yayımlandığı gün Pattern səhmləri 13% ucuzlaşdı. Lakin o vaxtdan onların qiyməti iki dəfə artıb. Pattern nümayəndələri hesabatı şərh etməkdən imtina ediblər.
Hər halda Rayt və Alder üçün indi ən maraqlı mərhələlərdən biridir.
“Biz istehlakçı davranışında və alış vərdişlərində fundamental dəyişikliklərin kəsişmə nöqtəsindəyik və bunun nəticəsi agent əsaslı ticarət olacaq”, — deyə Rayt bildirir. “Bir vaxtlar düşünürdük ki, bazarda OpenAI və Gemini kimi cəmi bir neçə süni intellekt modeli olacaq. Amma indi, məncə, hamımız görürük ki, uğurlu modellərin sayı gözlədiyimizdən qat-qat çoxdur”.
Gələcəkdə müxtəlif süni intellekt modelləri vasitəsilə birbaşa alış-veriş etmək mümkün olduqda Pattern onları yeni ticarət platformaları kimi nəzərdən keçirməyi planlaşdırır. Şirkət TikTok Shop sürətlə populyarlaşmağa başlayanda da oxşar yanaşma ilə həmin platformaya genişlənmişdi.
Rayt bütün planlarını açıqlamır, amma süni intellekt vasitəsilə alış-verişin Pattern üçün ən böyük imkanlardan biri olduğunu vurğulayır.
Süni intellekt modelləri vasitəsilə alış-verişin həqiqətən yeni reallığa çevrilib-çevrilməyəcəyi hələ aydın deyil. Amma hazırda Pattern-in həmtəsisçilərinin yuxusunu qaçırmağa kifayət qədər başqa səbəbləri də var.
