“Nazirlər Kabinetinin qərarı ilə 2018-2025-ci illər ərzində Azərbaycan hökuməti “Azərenerji”yə xarici valyutada öhdəliklərinin yerinə yetirilməsi üçün əlavə kapital inyeksiyası həyata keçirəcək”.
Bu barədə “Standard&Poors” beynəlxalq reytinq agentliyi “Azərenerji” ASC-nin reytinqi ilə bağlı yaydığı məlumatda qeyd olunub.
Bildirilir ki, bu günə qədər hökumət “Azərenerji”nin likvidlik çatışmazlığının aradan qaldırılması və faiz ödənişlərinin həyata keçirilməsinə dəstək olub. “Belə başa düşürük ki, Azərbaycan hökuməti ehtiyac olarsa, 2018-ci ildə şirkətin borclarının və faiz ödənişlərini yerinə yetirilməsi üçün büdcədə şirkətə kifayət qədər maliyyə inyeksiyası nəzərdə tutub. İnanırıq ki, Maliyyə Nazirliyi “Azərenerji”nin borclarının ödənilməsinə yaxından nəzarət edir və “Azərenerji” də öz növbəsində digər dövlət qurumları kimi hökumətin təsdiqi olmadan yeni borclanmalara getmir. Hökumətin şirkətə cari borclarını ödəməkdə maliyyə yardımı etməsinə və ödənişlərin toplanmasına nəzarət etməsinə baxmayaraq, hələ də “Azərenerji”də yüksək borclanma var və kapital xərclərinin maliyyələşdirilməsi məsələsi hələ də qeyri-müəyyəndir. Bun görə də biz şirkətin reytinqini Azərbaycanın reytinqinə bərabər tutmuruq. Əksinə, “Azərenerjinin” reytinqi bir qədər də aşağı salına bilər,” – deyə məlumatda qeyd olunub.
Agentliyin mütəxəssisləri qeyd edir ki, “Azərenerji”nin reytinqi üzrə proqnozun neqativ olması hökumətin şirkətə uzunmüddətli strategiya çərçivəsində maliyyə dəstəyi göstərib-gəstərməyəcəyi ilə bağlı qeyri-müəyyənliyi əks etdirir: “Xüsusilə biz neqativ proqnozda böyük investisiya proqramının maliyyələşdirilməsi, “Azərişıq” tərəfindən davamlı olaraq ödənişlərin yığılması, tariflər və ümumilikdə, hökumətin şirkətin yüksək borclanmasına davamlılığı məsələsini əsas götürmüşük. Şirkətin dövlətin zəmanəti olmadan yeni borclanmaya getməsi, fikrimizcə, hökumət dəstəyinin azalması mesajını ötürəcək. Bundan başqa, “Azərenerji”nin likvidlik mövqeyinin yoxlanması və likvidlik çatışmazlığının aradan qaldırılması üçün maliyyə dəstəyi təminatı üzrə hökumətin mexanizmlərinin zəifləməsi də şirkətin reytinqini təzyiq atında qoya bilər. Düşünürük ki, yaxın müddətdə şirkətin strukturu və aktivlərinin tərkibi dəyişməyəcək. Əgər hökumətin şirkətə dəstəyinin zəiflədiyini hiss etsək, “Azərenerji”nin reytinqi aşağı salınacaq”.
