Arıçılıq dünyada ən qədim təsərrüfat sahələrindən biri hesab olunur. Bu qədim sahə min illər ərzində inkişaf edib, arının saxlanması və məhsuldarlığın artırılması istiqamətində daim yeniliklər tətbiq edilib. Əlverişli iqlim şəraitinə, zəngin bitki örtüyünə malik olan Azərbaycan da tarixən arıçılığın inkişaf etdiyi ölkələrdəndir. Azərbaycan arıçıları arıçılıq sahəsindəki yenilikləri daim izləyir və təsərrüfatlarında tətbiq edirlər.
Tərtər rayonundan olan arıçı Bəkir Ağayev də beynəlxalq təcrübədən yararlanaraq bir pətəkdə iki və daha çox ana arı saxlamaqla ölkəmizdə yeniliyə imza atıb. Kanada təcrübəsinə əsaslanan arıçı müsahibəsində çoxanalı pətəyin üstünlükləri barədə danışıb. O, yeni üsulun tətbiqi sayəsində pətəkdə işçi arıların sayının artacağını, bunun isə məhsuldarlığa müsbət təsir göstərəcəyini deyib: “Arıçılıq mənim hobbimdir. Daim dünya arıçılığı ilə maraqlanır, bu sahədəki yenilikləri öyrənirəm. Kanadada istifadə olunan çoxanalı üsulu da öz təsərrüfatımda tətbiq etdim. Qeyd edim ki, normal ana arı bir sutkada 18 min yumurta qoya bilir. İkianalı sistemdən istifadə etdikdə bu, 36 min, dördanalı sistem olarsa, 72 min deməkdir. Bu isə məhsul bolluğuna gətirib çıxarır. Bal, arı südü, çiçək tozu, güləm və digər məhsullar da istehsal edirik. Çoxanalı sistem tətbiq edildikdə, balla yanaşı, digər arıçılıq məhsullarının istehsalını da artırmaq mümkündür”.
Təcrübə məqsədilə ilkin olaraq 10 pətəkdə yeni üsulu tətbiq edən arıçı gələcəkdə bütün təsərrüfatını bu istiqamətə yönəltməyə çalışacağını deyib. Bildirib ki, yeni üsulun tətbiqi üçün ana setkasından istifadə edilir. Pətəkdəki ana arılar eyni yaşda olmalıdırlar. Əgər ana arıların biri digərindən 1-2 yaş böyük olarsa, onun əmri ilə digəri işçi arılar tərəfindən məhv edilər. Odur ki, ana arıların hansı ilə mənsub olduğunu bilmək üçün onların boynunun arxasından hər ilə uyğun bir rəngdə işarələnir. Pətəyə qoyulmuş setkadan işçi arılar asanlıqla keçirlər. Ana arılar və erkək arılar isə böyük olduqları üçün setkadan keçə bilmirlər. Əgər pətək setka ilə mərtəbələrə ayrılmasa, daha güclü ana arı digər ana arını məhv edər.
Arıçı bildirib ki, gələcəkdə üç və daha çox ana arılı sistem tətbiq etməyi nəzərdə tutub. 6-7 mərtəbədən ibarət üçanalı sistemlə hər bir pətəkdən 80-100 kiloqram bal götürmək mümkündür.
Təsərrüfatında 120 arı ailəsi bəsləyən Bəkir Ağayev arıları payız-qış mövsümündə Tərtərdə saxlayır, may ayının sonunda Kür çayının kənarına, daha sonra isə İsmayıllı və Ağcakənd zonalarına aparır. Arılar Tərtərdə akasiya, Kür qırağında biyan, yağtikanı, İsmayıllıda qaratikan, Ağcakənddə isə cökədən bal toplayırlar.
