ABŞ-da yeni sahibkarlıq dalğası müşahidə olunur. Banker.az xəbər verir ki, bu barədə nüfuzlu “The Economist” jurnalı yazır.
Dərgi bildirir ki, 2024-cü ilin əvvəlindən etibarən hər ay orta hesabla 466 min nəfər yeni biznes açmaq üçün müraciət edir. Bu göstərici pandemiyadan əvvəlki dövrlə müqayisədə demək olar ki, iki dəfə çoxdur.
Bunun bir neçə səbəbi var. Əmək bazarı əvvəlki qədər cəlbedici deyil: gənc mütəxəssislər üçün iş tapmaq çətinləşib, bir çoxu isə ofisə qayıtmaq istəmir. Eyni zamanda elektron ticarətin inkişafı sayəsində niş məhsul və xidmətlərə tələbat artıb. Lakin əsas hərəkətverici qüvvə süni intellekt (AI) olub.
Bu gün AI sahibkarlara veb-sayt yaratmağa, sənədlərlə işləməyə, gündəlik prosesləri avtomatlaşdırmağa və minimal xərclərlə layihələrə başlamağa kömək edir. Əvvəllər biznesə başlamaq üçün komanda lazım idisə, indi bir çox işi tək bir nəfər görə bilir.
İqtisadçılar bunu “tək sahibkarlar” (solopreneurs) dövrünün başlanğıcı adlandırırlar. Onların bir çoxu sonradan əməkdaşlar işə götürərək kiçik layihələrini tamhüquqlu şirkətlərə çevirirlər. AI-nin təkcə texnologiyanı deyil, müasir sahibkarlıq modelini də dəyişdirdiyi qeyd olunur.
ŞƏKİL 1:ABŞ-da yeni biznes müraciətlərinin statistikası (2010–2026)
Qrafikdə ABŞ-da hər ay qeydə alınan yeni biznes müraciətlərinin sayı və 2021–2025-ci illər arasında müxtəlif sahələr üzrə orta illik faiz dəyişimi göstərilir.
