ABŞ prezidenti Donald Tramp ölkədə fövqəladə vəziyyət elan edib. Cənab Tramp buna səbəb kimi ABŞ-də ticarət kəsiri təhlükəsini göstərib. ABŞ prezidentinin fərmanı Ağ Evin mətbuat xidmətinin saytında yerləşdirilib.
“İkitərəfli ticarət əlaqələrində qarşılıqlılığın olmaması, qeyri-mütənasib tarif dərəcələri və ABŞ-nin ticarət tərəfdaşlarının iqtisadi siyasəti milli təhlükəsizlik və iqtisadiyyat üçün fövqəladə təhlükə yaradır. Mən bu təhlükə ilə əlaqədar milli fövqəladə vəziyyət elan edirəm”, – deyə Tramp söyləyib.
ABŞ prezidenti həmçinin Amerikanın digər ölkələrdən gələn mallara cavab rüsumları tətbiq edəcəyini açıqlayıb. Çinə tariflər 34%, Avropa İttifaqına 20% təşkil edib. Rusiya bu siyahıda yoxdur. ABŞ Maliyyə Nazirliyi bunu ABŞ-nin “Rusiya ilə ticarət etməməsi” ilə izah edib.
