Əgər bazar ABŞ Prezidenti Donald Trampın tarif təhdidlərini daha ciddi qəbul edərsə, Kanada dolları və Meksika pesosu zəifləyə bilər.
Banker.az xəbər verir ki, bu barədə ING analitiki Francesco Pesole bildirib.
Tramp bazar ertəsi bildirib ki, bir aylıq ilkin gecikmədən sonra gələn ay Kanada və Meksikaya tariflər tətbiq olunacaq. Pesole deyir ki, bu tariflərin tətbiq olunması ehtimalı azdır və bazarlar da bu riskin baş vermə ehtimalını cüzi şəkildə qiymətləndirirlər. Lakin bazar bu həftə daha çox riskləri nəzərə alarsa, USD/CAD və USD/MXN qısa müddətli artımla üzləşə bilər.
Avropada fəaliyyətdə olan valyutadəyişmə şirkəti “Monex Europe” analitikləri qeyd edirlər ki, Kanada dollarının daha da zəifləmək üçün yer var. Çünki Prezident Tramp əvvəlki bir aylıq gecikmədən sonra gələn ay Kanada və Meksikaya tariflər tətbiq edəcəyini bildirib
“Hələlik düşünürük ki, bazarlar USD/CAD məzənnəsini aqressiv şəkildə artırmaqda ehtiyatlı davranacaqlar, xüsusilə də əvvəlki tarifin dayandırılması nəzərə alınsa,” – deyə onlar bildirirlər.
Lakin treyderlər əlavə bir dayandırma barədə xəbər gözləmədən nə qədər çox vaxt keçirsələr, USD/CAD bir o qədər yüksələ bilər. Tariflərin yaxın aylarda müəyyən bir məqamda tətbiq olunması ehtimalı yüksəkdir və bu, USD/CAD məzənnəsini 1.50-yə çatdıra bilər.
USD/CAD bazar ertəsi 1.4282 səviyyəsinə çataraq bir yarım həftənin ən yüksək nöqtəsinə yüksəldikdən sonra 1.4260 səviyyəsində sabit qalır. USD/MXN isə bazar ertəsi bir həftənin ən yüksək səviyyəsi olan 20.5257-ə çatdıqdan sonra 0.2% azalaraq 20.4449-a düşüb. DXY dollar indeksi 106.623 səviyyəsində ticarət edilir.
Bununla belə, Prezident Trampın son tarif açıqlamalarını qiymətləndirir və ABŞ iqtisadi məlumatlarını gözləyiyindən ABŞ dollar sabit olaraq ticarət edilir.
“İndiyə qədər Trampın sözləri əməllərindən daha sərt olub, lakin bu mövqeyin növbəti dörd il ərzində dəyişməz qalacağını düşünmək yanlış ola bilər,” – deyə “Pepperstone” strateqi Maykl Braun qeyd edir.
Bu arada nüfuzlu ABŞ bankı “Morgan Stanley” ABŞ dolları barədə maraqlı fikirlə gündəmə gəlib. Bank qeyd edir ki, 2017-ci ildə ABŞ dolları ucuzlaşmışdı. Bu, ABŞ-ın ticarət siyasəti, qlobal iqtisadi artım və Avropadakı siyasi hadisələrin nəticəsi idi. Bu il də eyni səbəblərin bir qismi təkrarlanacaq və ABŞ valyutası yenidən ucuzlaşacaq.
