ABŞ prezidenti Donald Tramp bildirib ki, vitse-prezident Cey Di Vens və dövlət katibi Marko Rubio 2028-ci il prezident seçkilərində “xəyallardakı komanda” yarada bilərlər. Bu barədə “The Hill” məlumat yayıb.
“Hansı biriniz Cey Di Vensi bəyənir? Hansı biriniz Marko Rubionu bəyənir? — deyə Tramp Milli Polis Həftəsi münasibətilə hüquq-mühafizə orqanlarının nümayəndələri ilə Gül bağında keçirilən şam yeməyində soruşub. — Əla. Yaxşı seçim kimi səslənir”.
“Cey Di ideal variantdır. Bu, ideal seçimdir”, — deyə prezident bildirib.
Amerika lideri əlavə edib ki, bu sözlər onun hər iki namizədi dəstəklədiyi anlamına gəlmir. “Amma bilirsiniz… Məncə, bu, prezidentliyə və vitse-prezidentliyə namizəd kimi səslənir”, — deyə o vurğulayıb.
Marko Rubio hələ 2016-cı ildə prezidentliyə namizədliyini irəli sürmüşdü, lakin praymerizdə Trampa məğlub olduqdan sonra kampaniyasını dayandırmışdı. Daha sonra Senata qayıdan Rubio Trampın ikinci administrasiyasına qoşulana qədər orada fəaliyyət göstərib, Vens isə Tramp onu komandasına dəvət etməzdən əvvəl senator olub.
“İnsanların Markoya münasibətini qiymətləndirmək Trampın üslubuna tam uyğundur. Sponsorların, siyasətçilərin və hətta media nümayəndələrinin nə düşündüyünü anlamaq prezidentin DNT-sinə işlənib”, — deyə Trampın 2016 və 2020-ci illərdəki seçki kampaniyalarında Respublikaçılar Partiyasının strateqi olmuş Brayan Seytçik bildirib.
Apreldə “Politico” yazmışdı ki, Ağ Evdə Rubionu 2028-ci il seçkiləri öncəsi prezident postuna ciddi namizəd kimi daha tez-tez görürlər, baxmayaraq ki, favorit hələ də Vens sayılır.
“Financial Times” isə qeyd edib ki, dövlət katibi ABŞ-İran müharibəsindən qəsdən uzaq durmağa çalışa bilərdi ki, strateji üstünlüyünü qoruyub saxlasın. Qəzetin mənbələrinin sözlərinə görə, Rubio iranlılarla danışıqlara rəhbərlik etməyə can atmır ki, mümkün uğursuzluğa görə məsuliyyət daşımamış olsun. Bundan əlavə, o, o qədər çox vəzifəyə təyin olunub ki, artıq “hər şeyin katibi” kimi tanınır.
