ABŞ prezidenti Donald Tramp bildirib ki, ABŞ və İsrailin həyata keçirdiyi hərbi əməliyyatlardan sonra İranın bərpası təxminən 20 il çəkə bilər. O, bu fikirləri radio aparıcısı Hyu Hyuitt ilə söhbətində səsləndirib.
Trampın sözlərinə görə, dağıntıların miqyası o qədər böyükdür ki, münaqişə başa çatdıqdan sonra belə ölkə “heç vaxt əvvəlki kimi olmayacaq”. O həmçinin qeyd edib ki, neft infrastrukturuna dəyən ziyan İran iqtisadiyyatı üçün uzunmüddətli nəticələr yarada bilər. “Əgər biz bu gün geri çəkilsək, onların ölkəni bərpa etməsi üçün 20 il lazım olacaq və o, artıq heç vaxt əvvəlki kimi olmayacaq”, — deyə Tramp bildirib.
ABŞ prezidenti əlavə edib ki, ölkədə vəziyyət bir çox aspektlər üzrə, o cümlədən enerji sisteminin vəziyyəti baxımından “partlayış həddində” qalır.
5 may tarixində “Reuters” yazıb ki, ABŞ və İran arasında iki ay davam edən qarşıdurma nəticəsində Tehranın nüvə proqramına yalnız məhdud zərər dəyib. Agentliyin məlumatına görə, İranın nüvə silahı yaratması üçün tələb olunan müddətlə bağlı qiymətləndirmələr demək olar ki, dəyişməyib. Hələ 2025-ci ilin yayında analitiklər ABŞ və İsrailin zərbələrinin bu prosesi təxminən bir il geri saldığını bildirirdilər və bu qiymətləndirmələr hələ də актуallığını qoruyur.
