“Polşaya rəsmi səfəri ABŞ-da cari ilin noyabr ayında keçiriləcək prezident seçkilərindən sonraya planlaşdırıram”.
Bunu ABŞ prezidenti Donald Tramp Polşa prezidenti Anjey Duda ilə keçirdiyi mətbuat konfransında bəyan edib.
“Seçkilərin sonuna qədər bunu edə bilməyəcəyəm . Amma hər şey qaydasında olsa, cavabım tamamilə müsbətdir”.
Qeyd edək ki, ötən ilin avqust ayında ölkədə baş verən qasırğa səbəbiylə ABŞ prezidentinin Polşaya rəsmi səfəri təxirə salınmışdı.
Xatırladaq ki, bu il iyunun 28-də Polşada da növbəti prezident seçkiləri keçiriləcək. Artıq prezidentliyə 10 namizəd qeydə alınıb. Hazırkı dövlət başçısı A.Duda keçmiş baş nazir Yaroslav Kaçinskinin rəhbərlik etdiyi “Qanun və Ədalət” partiyasını təmsil edir.
A.Dudanın əsas rəqibi Varşavanın hazırkı meri Rafal Tşaskovski sayılır. R.Tşaskovski keçmiş Baş nazir Donald Tuskun kabinetində bir müddət nazir postunu tutub.
