2023-cü ildə Ukrayna BMT-dən 1.8 milyard dollara yaxın vəsait alıb. Bunu Rusiyanın BMT-dəki daimi nümayəndəsi Vasili Nebenzya dünya təşkilatının Təhlükəsizlik Şurasının iclasında çıxışı zamanı bildirib.
2023-cü ilin fevralında BMT beynəlxalq ictimaiyyəti Ukraynaya dəstək üçün 5.6 milyard dollar ayırmağa çağırıb. Təşkilat qeyd edib ki, 3.9 milyard dollar ölkədə qalan sakinlərə ərzaq, tibbi və pul yardımı üçün, daha 1.7 milyard dollar isə ukraynalı qaçqınların dəstəklənməsinə yönəldiləcək.
Aprel ayında BMT bildirmişdi ki, 2023-cü ilin birinci rübündə Ukraynanın 2 milyona yaxın sakini təşkilatdan nağd yardım alıb. BMT-nin mətbuat katibi Stefan Düjarrikin sözlərinə görə, bunun üçün 200 milyon dollar ayrılıb. Sonra o, ümumilikdə Ukraynada 4.4 milyon insana yardımın göstərilməsinin nəzərdə tutulduğunu, ümumilikdə onlara 1 milyard dollara yaxın vəsaitin köçürüləcəyini bildirib.
