Milyarder Uorren Baffet (Forbes-un qlobal milyarderlər reytinqində 10-cu yerdədir, 14 iyul tarixinə Forbes Real-Time Billionaires məlumatına əsasən sərvəti 140,9 milyard dollar təşkil edir), Berkshire Hathaway şirkətində sahib olduğu səhmləri qarşıdakı səkkiz il ərzində övladlarının xeyriyyə fondlarına bağışlayacağını açıqlayıb. Bu barədə Baffetin bəyanatına istinadən Bloomberg xəbər verib.
Baffetin qızı Syuzan, oğulları Hovard və Piterin rəhbərlik etdiyi Sherwood Foundation, Howard G. Buffett Foundation və NoVo Foundation fondlarının hər biri 1 milyon ədəd B sinifli Berkshire Hathaway səhmi alacaq. Daha 9 milyon səhm isə milyarderin mərhum həyat yoldaşının şərəfinə yaradılmış Susan Thompson Buffett Foundation fonduna veriləcək.
Fondlara səhmlərin ötürülməsi 31 dekabr 2034-cü ilədək başa çatdırılacaq. Baffet bildirib ki, övladlarının fondlarına ayrılan qrantların həcmini hər il artırmaq, həyat yoldaşının adını daşıyan fondun maliyyələşməsini isə daha sürətlə artırmaq niyyətindədir.
Bloomberg yazır ki, hazırda Baffetin Berkshire Hathaway şirkətində 188 290 ədəd A sinifli və 1 162 ədəd B sinifli səhmi var. Şirkətin strukturuna görə, A sinifli səhmlər B sinifli səhmlərlə müqayisədə daha çox səsvermə hüququ verir. Hər bir A sinifli səhm 1 500 B sinifli səhmə çevrilə bilər.
Agentliyin məlumatına görə, Baffet son 20 ildə ilk dəfə olaraq ənənəvi ianəsini Bill Qeyts Fonduna etməyib. Bu qərar ABŞ Ədliyyə Nazirliyinin Bill Qeytsin Cefri Epşteynlə əlaqələrini göstərən sənədləri dərc etməsindən sonra verilib. Bildirilir ki, Bill Qeyts Fondu Epşteynlə bağlı əlaqələr üzrə daxili araşdırmaya başlayıb və yeni xeyriyyə tərəfdaşlarının yoxlanılması siyasətini yenidən nəzərdən keçirməyi planlaşdırır. The Wall Street Journal-ın məlumatına görə, Baffet əlavə ianələr barədə qərar verməzdən əvvəl həmin araşdırmanın nəticələrini gözləmək istəyir.
Baffet 2025-ci ildə bildirmişdi ki, vəfatından sonra övladlarının mirası idarə etməsini asanlaşdırmaq üçün xeyriyyə ianələrinin ötürülməsini sürətləndirəcək. Təxminən bir il əvvəl o, üç fonda ümumi dəyəri 320 milyon dollar olan Berkshire Hathaway səhmləri bağışlamış və ilin sonunadək onların hər birinə əlavə olaraq təxminən 200 milyon dollar ayıracağını vəd etmişdi.
Uorren Baffet 1965-ci ildən Berkshire Hathaway şirkətinə rəhbərlik edib. O, 2026-cı ildə baş direktor vəzifəsindən ayrılıb. Şirkətin yeni baş direktoru Qreq Abel olub, Baffet isə direktorlar şurasının sədri kimi fəaliyyətini davam etdirir.
