ABŞ Prezidenti Donald Tramp administrasiyası Amerika universitetlərini bitirən xarici tələbələrin məzun olduqdan sonra işləməsinə görə 100 min dollar məbləğində ödəniş tətbiq edə bilər. Bu barədə The Wall Street Journal (WSJ) mənbələrə istinadən yazır.
Belə bir qayda qəbul olunarsa, Tramp ABŞ-yə qanuni immiqrasiya imkanlarını daha da məhdudlaşdıra bilər. Qəzetin yazdığına görə, bu addım ABŞ-də təhsili xarici vətəndaşlar üçün xeyli az cəlbedici edəcək. Qanun xüsusilə xarici tələbələrdən sabit gəlir əldə edən ali təhsil müəssisələrinə zərər vuracaq. WSJ hesab edir ki, bu qərar həmçinin Silikon Vadisi və Uoll-Strit şirkətlərinə də təsir göstərəcək, çünki onlar digər ölkələrdən olan mütəxəssisləri fəal şəkildə işə götürürlər.
Nəşrin həmsöhbətinin sözlərinə görə, ödəniş tələbə vizası əsasında məzunların 1–3 il işləməsinə imkan verən Optional Practical Training (OPT) proqramlarında iştirak üçün tutulacaq. WSJ-nin məlumatına əsasən, 2024-cü ildə ABŞ-də bu proqram çərçivəsində işləyən xarici məzunların sayı 419 min nəfər olub.
İyunun 26-da məlum olub ki, ABŞ siyasi sığınacaq üçün müraciət edən əcnəbiləri artıq qəbul etməyəcək. Ölkə bu cür müraciətləri digər dövlətlərə yönləndirəcək.
Tramp hələ 2025-ci ilin noyabrında bəyan etmişdi ki, ABŞ sisteminin “bərpasına imkan yaratmaq” məqsədilə üçüncü dünya ölkələrindən immiqrasiyanı tamamilə qadağan etmək niyyətindədir. O bildirmişdi ki, Co Bayden dövründə baş verən “milyonlarla qanunsuz girişə” son qoyacaq, ABŞ vətəndaşı olmayan şəxslər üçün federal güzəştləri ləğv edəcək, onun sözlərinə görə “ölkədaxili sabitliyi pozan” miqrantların vətəndaşlığını ləğv edəcək, həmçinin “yük, təhlükəsizlik riski və ya Qərb sivilizasiyası ilə uyğun gəlməyən” bütün şəxsləri deportasiya edəcək.
