12 C
Baku
Thursday, March 28, 2024

Xaçmaz bağlarında gilasın tezyetişən sortu 2-2,5 manata satılır

Xaçmazlı sahibkarlar may ayının son günlərindən etibarən gilas bağlarında məhsul yığımına başlayıblar.

Təsərrüfatçılar gilasın bir kiloqramını keyfiyyətindən asılı olaraq yerində 2-2,5 manata satırlar. Yığılan məhsul yerli və paytaxt bazarlarında satışa çıxarılır.

Rayonun Pirquluoba kəndində 500 hektardan çox gilas bağı var. Gilasın yetişdirilməsinin böyük xərc tələb etdiyini söyləyən bağ sahibi Asəf Babayev hazırkı satış qiymətinin onları qane etdiyini vurğulayıb.

İyun ayı gilas yığımının ən qızğın çağıdır. Bağ sahibləri bu ayın 10-na kimi gilasın tezyetişən sortlarının yığılmasını başa çatdıracaqlar. Sonra gilasın digər sortlarının yığımına başlanılacaq.

Alıcı Habil Məlikov bildirib ki, yığılan məhsul ölkəmizlə yanaşı, qonşu Rusiya Federasiyasının müxtəlif bölgələrinin bazarlarına da aparılır. “Məhsul boldur. Hələ ki, tezyetişən sortlar yığılır. Kütləvi yığım başlayanda məhsulun Rusiyaya satışına başlanacaq. Bu il gilasın qiymətinin 3 manatdan baha olacağını düşünürəm. Dövlətimiz çox sağ olsun ki, əlavə dəyər vergisini də aşağı salıb. Rusiyaya gedən əsas sort “Napoleon”dur”,-deyə H.Məlikov bildirib.

Xaçmaz rayonunda gilasın “Krım”, “Romanovka”, “Öküzürəyi”, “Napoleon”, “Ağ gilas” və başqa növləri yetişdirilir.

Xaçmaz rayonunda, ümumilikdə, 2 min 441 hektar gilas bağı var ki, bunun da 1769 hektarı barverəndir. Ötən il gilas bağlarından 17 min 403 ton məhsul yığılıb. Hər hektara görə məhsuldarlıq 100 sentnerə yaxın olub.

Respublikamızın şimal bölgəsində gilas yetişdirməklə məşğul olan fermerlər bu meyvəni Rusiya ilə yanaşı, digər xarici bazarlara da ixrac etmək imkanının olduğunu deyirlər. Bu isə ölkəmizə xarici valyutanın daxil olmasında əhəmiyyətli rol oynaya bilər.

MənbəAzərtac
Son xəbərlər
Digər xəbərlər