Yeni Zelandiya iqtisadiyyatı ikinci rübdə gözləniləndən daha çox böyüyüb.
Banker.az bu barədə xarici mətbuata istinadən xəbər verir.
Ölkədə ilin ilk üç ayında COVID-19 infeksiyasına yoluxma halları artdığına görə iqtisadiyyat kiçilmişdi. Lakin bu kiçilmə ikinci rübdə resessiyaya dönmədi.
Cümə axşamı Vellinqtonda açıqlanan statistikaya görə, ümumi daxili məhsul 1.7% artıb. İqtisadçı-ekspertlər isə 1% artım gözləyirdilər. Xatırladaq ki, birinci rübdə ÜDM 0.2% azalmışdı.
Proqnoza görə, Mərkəzi Bank son 32 ilin ən yüksək səviyyəsi olan 7.3%-lik inflyasiyanı cilovlamaq üçün kredit faizlərini kəskin şəkildə artırmağa davam edəcək. Yenə də əmlak qiymətlərinin aşağı düşməsi və qlobal qeyri-müəyyənliyin artması ilə əlaqədar olaraq, 2023-cü ildə zəif artım və hətta durğunluq ehtimalı var.
