Ukraynanın ABŞ dəstəyi olmadan sağ qalması çox çətindir və bu, faktdır.
Bunu Ukrayna Prezidenti Vladimir Zelenski CNN-ə müsahibəsində deyib:
“ABŞ-ın yardımı olmasaydı, bu, dondurulmuş münaqişə olardı. ABŞ-ın yardımı ilə biz öz ərazilərimizi işğaldan azad edəcəyik, işğaldan azad edilən hər şəhər Putini zəiflədir. Biz bundan qorxmamalıyıq”.
Zelenski müharibə bitənədək üzvlük verilməsə belə, ölkəsinin NATO-ya dəvət edilməsinin ABŞ Prezidenti Co Baydendən asılı olduğunu deyib və onu bu addımı indi atmağa çağırıb.
“Bu gün Ukraynanın NATO-ya daxil olub-olmamasına ABŞ qərar verir. Bu günkü vəziyyət budur və bu, bir faktdır – NATO ölkələrinin əksəriyyəti Ukraynanın NATO-ya dəvət edilməsini dəstəkləyir, tərəddüdü olanlar isə sadəcə olaraq Prezident Baydenə baxır və o, (Bayden) bilir ki, bu ondan asılıdır, bu onun qərarı olacaq”.
Zelenski qeyd edib ki, Ukraynanın NATO-ya dəvət edilməsi əsgərləri üçün böyük motivasiya olacaq.
