Cəlb olunan vəsaitlər orta və kiçik sahibkarlığın maliyyələşdirilməsinə yönəldiləcək.
AccessBank, Qara Dəniz Ticarət və İnkişaf Bankı (QDTİB) ilə 15 milyon ABŞ dolları məbləğində kredit müqaviləsi imzalayıb. Cəlb olunan maliyyə vəsaitləri Azərbaycanda sənaye, kənd təsərrüfatı və istehsal sahələri ilə məşğul olan kiçik və orta bizneslə məşğul olan sahibkarların (KOB) məhsullarının və xidmətlərinin müasirləşdirilməsi, həmçinin artırılması və diversifikasiyası üzrə layihələrin maliyyələşdirilməsinə və onların işçi kapitala olan tələbatınn ödənilməsinə yönəldiləcək.
AccessBank-ın Baş Meneceri Mixael Xoffmann sazişin imzalanmasını şərh edərək deyib: “Uzunmüddətli tərəfdaşımız olan QDTİB-nın bu dəstəyini yüksək qiymətləndiririk. Ayrılan vəsaitlər Bankın KOB müştərilərinin kreditləşməsinə yönəldiləcək, bu isə, öz növbəsində, Azərbaycanda regional iqtisadiyyatın inkişafına kömək edəcək”.
QDTİB-nın Sofiyada keçirilən İllik Yığıncağı zamanı təşkil olunan imzalanma məsarimində Bankın Prezidenti Andrey Kondakov deyib: “AccessВank-la inkişaf etmiş əməkdaşlıq qeyri-neft sektorunda biznesin inkişafının dəstəklənməsi və investisiyalar vasitəsi ilə iqtisadiyyatın artımına və diversifikasiyası məqsədi ilə QDTİB-nın strategiyasının Azərbaycanda tətbiq olunmasına kömək edir”.
