Azərbaycan Mərkəzi Bankı 2020-ci ilin fevral ayının 1-ə olan depozit və əmanətlər üzrə orta faiz dərəcəsini açıqlayıb.
Banker.az AMB-yə istinad edərək xəbər verir ki, 2020-ci ilin fevral ayında verilmiş kreditlər üzrə orta faiz dərəcəsi manatla 13,96%, xarici valyuta ilə 5,86% təşkil edib. Cari ilin fevral ayını ötən ay ilə müqayisə edəndə məlum olur ki, manatla kreditlər üzrə orta faiz dərəcəsi 0,04 faiz bəndi artıb, xarici valyutada kreditlər üzrə orta faiz dərəcəsi 0,04 faiz bəndi azalıb.
2020-ci ilin fevralında fiziki şəxslərə verilən kreditin orta faiz dərəcəsi manatda 16,61% , xarici valyutada 7,98% olub. Hüquqi şəxslərə həmin ayda kreditlər manatda orta hesabla 8,80%, xarici valyutada 5,33% təşkil edib. Belə ki, fiziki şəxslərə verilən kreditlərin orta faiz dərəcələri manatda yanvar ayı ilə müqayisədə manatda 0,02 faiz bəndi, xarici valyutada isə 0,03 faiz bəndi azalıb. Hüquqi şəxslərə verilən kreditlərin orta faiz dərəcələri isə manatda və xarici valyutada eyni qalıb.
Mərkəzi Bankın statistikasına əsasən, fevral ayında manatla depozit və əmanətlər üzrə orta faiz dərəcəsi 9,26% , xarici valyuta ilə 1,89% təşkil edib. Ötən ay ilə müqayisədə fevralda manatla depozit və əmanətlər üzrə orta faiz dərəcəsi 0,01 faiz bəndi azalıb, xarici valyutada isə depozit və əmanətlər üzrə orta faiz dərəcəsi isə 0,05 faiz bəndi artıb.
Fevral ayında hüquqi şəxslərdən manatla depozitlər ortalama 4,58%, xarici valyutada isə 1,16%-dən cəlb edilib. Hesabat ayında fiziki şəxslərdən manatla cəlb edilmiş depozitlərin orta faizi 9,60%, xarici valyutada isə 2,39% olub.
