Dekabrın 27-də Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzli ilə Rusiya Federasiyasının Baytarlıq və Fitosanitar Nəzarəti üzrə Federal Xidmətinin (“Rosselxoznadzor”) rəhbəri Sergey Dankvert arasında videokonfrans formatında görüş keçirilib. Tərəflər 2021-ci ildə AQTA ilə Rosselxoznadzor arasında əməkdaşlığın yekunlarına dair fikir mübadiləsi aparıblar.
Banker.az bu barədə AQTA-ya istinadən xəbər verir.
Görüşdə bildirilib ki, Rusiyaya bitkiçilik məhsullarının ixracı 2020-ci illə müqayisədə 3% artaraq 523.8 min tondan 539.7 min tona çatdırılıb. Hazırda Azərbaycan MDB ölkələri arasında Rusiyaya ən çox pomidor və alma ixrac edən ölkələrdən biridir.
Görüşdə təsərrüfatlarda aparılmış 2603 monitorinqin yekun nəticəsi ilə bağlı AQTA-nın Rosselxoznadzora müraciəti əsasında 212 pomidor, 76 alma istehsalı müəssisəsindən Rusiya Federasiyasına məhsul ixracına icazə verildiyi, həmçinin 1 yanvar – 26 dekabr 2021-ci il tarixləri ərzində Rusiya Federasiyasına ümumilikdə 138 117 ton pomidor, 62 319 ton alma məhsulunun ixrac olunduğu diqqətə çatdırılıb.
Ölkə ərazisinə təhlükəli virus və bakteriya mənşəli xəstəliklərin keçməsinin qarşısının alınması istiqamətində əkin-səpin materiallarının idxalı və təsərrüfatlarda ciddi nəzarət tədbirlərinin həyata keçirildiyini diqqətə çatdıran AQTA sədri Qoşqar Təhməzli bitki karantini sahəsində “AQTİS” və FGİS “Argus-Fito” sistemlərinin inteqrasiyasının əhəmiyyətini qeyd edib, həmçinin “Аzərbaycan Respublikası Hökuməti ilə Rusiya Federasiyası Hökuməti arasında bitki karantini sahəsində əməkdaşlıq haqqında” Saziş layihəsinin aidiyyəti dövlət qurumları ilə razılaşdırıldıqdan sonra baxılması üçün Rusiya Federasiyasına göndərildiyini bildirib.
Q. Təhməzli Azərbaycandan Rusiyaya alma və pomidor məhsullarının ixrac prosedurlarının sadələşdirilməsi, eləcə də videomonitorinqlərin aradan qaldırılması və birgə səmərəli fəaliyyətə görə S. Dankvertə öz təşəkkürünü bildirib.
Sergey Dankvert bildirib ki, 2021-ci ildə “Rosselxoznadzor”un müvafiq qurumu Rusiya Elmlər Akademiyası ilə birgə bitki xəstəliklərinə qarşı mübarizə tədbirləri çərçivəsində təsirli vasitə ola biləcək peyvəndin hazırlanmasına başlayıb və bu peyvəndin tətbiq edilməsi gələcəkdə Azərbaycandan Rusiyaya pomidor ixracının həcminin artmasına şərait yaradacaq.
S. Dankvert qeyd edib ki, cari ildə Azərbaycandan Rusiyaya ixrac olunan kənd təsərrüfatı məhsullarının həcmi artırılıb. Belə ki, nektarin ixracı 3 dəfə (ötən il 4.3 min tona qarşı 12.9 min ton), şaftalı ixracı 3 dəfə (3.1 min tona qarşı 9.5 min ton), armud ixracı 2.9 dəfə (1.8 min tona qarşı 5.3 min ton), ərik ixracı 2.8 dəfə (712 tona qarşı 2 min ton) artıb. O cümlədən ölkəmizdən Rusiyaya üzüm ixracı üzrə 44% (6.5 min tona qarşı 9.4 min ton), xurma ixracı üzrə 33% (102.1 min tona qarşı 136.2 min ton), nar ixracı üzrə 24% (12 min tona qarşı 14.9 min ton), kartof ixracı üzrə isə 23% (69 min tona qarşı 85 min ton) artım qeydə alınıb.
