Berlin ölkənin hazırkı müdafiə naziri Kristin Lambrextin istefası imkanını nəzərdən keçirir. Bu barədə dekabrın 8-i “Politico” qəzeti yazıb.
Bildirilir ki, Bundestaqın iqtidar və müxalifətdən olan deputatları yaxın aylarda Lambrextin istefasını planlaşdırırlar. Nazirin işindən narazılığına səbəb orduda mərmi ehtiyatları ilə bağlı problemlər, müdafiə xərclərinə dair yerinə yetirilməmiş vədlər və ABŞ-dan F-35 qırıcılarının alınması ilə bağlı gecikmiş razılaşma olub.
Bundestaqın Yaşıllar Partiyasından olan deputatı Sebastyan Şeferin sözlərinə görə, əgər Almaniya bu gün müharibəyə girsəydi, o zaman ordunun ehtiyatı Ukraynaya təchizat nəzərə alınmasa belə, bir neçə saata kifayət edərdi.
Həmin gün Almaniya kansleri Olaf Şolts ölkə silahlı qüvvələrinin sursat çatışmazlığı yaşadığını bildirib. Onun sözlərinə görə, Lambrext “bu boşluğu aradan qaldırmaqda çox maraqlıdır”.
Noyabrın 23-də Lambrext ölkənin silah təchizatının sərhədlərinə yaxınlaşmasını qeyd edib. Onun sözlərinə görə, Almaniya bəzi ölkələrin yeni hərbi yardım tələblərini rədd etmək məcburiyyətindədir. Bununla belə, o, Almaniyanın Ukraynaya dəstəyini davam etdirəcəyini bildirib.
