Texniki baxış keçirilməsi üçün vətəndaşa bildiriş göndərilməldir. Qaz paylayıcısının işçiləri tərəfindən istehlakçıya 5 iş günü əvvəl bildiriş göndərilməklə ildə bir dəfə texniki baxış keçirilə bilər. Texniki baxış iki nüsxədə tərtib edilməlidir. Bu texniki baxışın keçirilməsi ödənişsizdir.
İstehlakçı havalandırma və havadəyişmə xətlərində nöqsan və (və ya) pozuntular aşkar etdikdə, onun müraciəti əsasında təkrar müayinə qaz paylayıcısı tərəfindən 3 iş günündən gec olmayaraq aparılmalıdır. İstehlakçı təkrar müayinə üçün il ərzində 1 dəfədən çox müraciət edərsə, növbəti müayinə ödənişli keçirilir. Ödənişin məbləği qaz paylayıcısı ilə istehlakçı arasında bağlanmış müqavilə ilə müəyyən edilir. Onu da qeyd etmək lazımdır ki, qaydalara əsasən istehlakçı qaz paylayıcısının işçilərinin xidməti vəsiqələrini təqdim etdikləri təqdirdə müayinə keçirilməsi üçün onun mülkiyyətində və ya istifadəsində olan tikinti obyektinə daxil olmasına maneə törətməməli və müayinənin keçirilməsinə şərait yaratmalıdır. Qanuna əsasən, istehlakçı qaz paylayıcısının işçilərinin müayinə keçirmələri üçün öz mülkiyyətində və ya istifadəsində olan tikinti obyektinə daxil olmalarına maneə törətdikdə və ya müayinənin keçirilməsinə şərait yaratmadıqda qazın verilməsi dayandırılır.
Əsas:
Qaz təchizatı haqqında qanuna əsasən Qaz paylayıcısının işçiləri istehlakçıya 5 (beş) iş günü əvvəl sifarişli poçt göndərişi və ya istehlakçının əvvəlcədən razılığı ilə elektron poçt və ya digər elektron kommunikasiya vasitələri ilə bildiriş təqdim etməklə (göndərməklə) ildə bir dəfə (hər il noyabrın 1-dək) müayinə keçirilməsini təmin etməli, nəticəsi barədə müvafiq icra hakimiyyəti оrqаnının müəyyən etdiyi orqanın (qurumun) təsdiq etdiyi formada 2 (iki) nüsxədə müayinə aktını istehlakçının (və ya onun səlahiyyətli nümayəndəsinin, yaxud yetkinlik yaşına çatmış ailə üzvlərindən birinin) iştirakı ilə tərtib etməli və aktın bir nüsxəsini istehlakçıya (və ya onun səlahiyyətli nümayəndəsinə, yaxud eyni ünvanda yaşayan yetkinlik yaşına çatmış ailə üzvlərindən birinə) təqdim etməlidir. Qaz paylayıcısı tərəfindən müayinə ödənişsiz həyata keçirilir (6-2). İstehlakçı qaz paylayıcısının işçilərinin müayinə keçirmələri üçün öz mülkiyyətində və ya istifadəsində olan tikinti obyektinə daxil olmalarına maneə törətdikdə və ya müayinənin keçirilməsinə şərait yaratmadıqda qazın verilməsi dayandırılır (13.6).
Qazdan istifadə Qaydalarının təsdiq edilməsi haqqında Nazirlər Kabinetinin 12 may 2011-ci il tarixli, 80 nömrəli qərarına əsasən, Qaz paylayıcısının işçiləri tərəfindən istehlakçıya 5 (beş) iş günü əvvəl sifarişli poçt göndərişi və ya istehlakçının əvvəlcədən razılığı ilə elektron poçt və ya digər elektron kommunikasiya vasitələri ilə bildiriş təqdim edildikdə (göndərildikdə), istehlakçı qaz paylayıcısının işçilərinin xidməti vəsiqələrini təqdim etdikləri təqdirdə müayinə keçirilməsi üçün onun mülkiyyətində və ya istifadəsində olan tikinti obyektinə daxil olmasına maneə törətməməli və müayinənin keçirilməsinə şərait yaratmalıdırlar (2.8).
