Ötən həftənin sonu Amerikada artımla açıqlanan ÜDM, həmçinin proqnozların üzərində dərc olunan sənaye və xidmət sektorlarında PMİ rəqəmləri fonunda dollar major valyutalar qarşısında bir qədər gücləndi.
Lakin, İsveçrə Mərkəzi Bankının 0.25%-lik faiz endiriminə baxmayaraq, “güvənli liman” missiyasını davam etdirən frank dollar qarşısında aktuallığını qorudu.
Keçən həftə ərzində 146.470 yen həddinə qədər bahalaşan USDJPY məzənnəsi də, cümə günü Amerikada azalma ilə açıqlanan inflyasiya göstəricilərindən sonra kəskin ucuzlaşdı və həftəlik şamını 142.150 yen səviyyəsində bağladı.
Zəngin iqtisadi təqvim ilə xarakterizə edilə biləcək bu həftə ərzində, bütün diqqətlər cümə günü Amerikada dərc olunacaq əkəm bazarı, xüsusilə də “NFP” hesabatına yönələcək. Bundan başqa, Avrozonada, Almaniyada və İngiltərədə açıqlanacaq İstehlak Qiymətləri İndeksi, sənaye və xidmət sektorlarında Biznes Aktivliyi İndeksi, ÜDM göstəriciləri, həmçinin, Amerikada yayımlanacaq sənaye və xidmət sektorlarında Biznes Aktivliyi İndeksi, İşsizlik Müavinəti üçün Müraciətlərinin sayı kimi statistik məlumatlar və “JOLTS” Boş İşyerləri və Vakansiyalar hesabatı bu həftənin iqtisadi təqvimində yer alır. Həmçinin, FED sədri Cerom Pavelin, Avropa Mərkəzi Bankının sədri K.Laqardın çıxışları investorların diqqət mərkəzində olacaq.
Türkiyədə və İsveçrədə açıqlanacaq İstehlak Qiymətləri İndeksi (CPİ) hesabatları da maraqla gözlənilir.
EUR
Cari həftə ərzində Avrozonada və Almaniyada CPİ, eləcə də, sənaye və xidmət sektorlarında Biznes Aktivliyi İndeksi göstəriciləri, Avropa Mərkəzi Bankının son toplantısının dərc olunacaq protokolları, həmçinin, AMB sədri K.Laqardın çıxışı avronun dünya birjalarındakı qiymətlərinə yön verə bilər.
Ötən həftəyə 1.1156 səviyyəsində start verən EURUSD məzənnəsi bahalaşaraq 1.1214 həddini test etsə də, burada “ayılar”-ın müqaviməti ilə üzləşdi və həftəlik şamını 1.1160 həddində bağladı.
“Buğalar” qiyməti 1.12$ həddinin üzərinə qaytara və bu həddin üzərində saxlaya bilsələr, artım tendensiyası davam edə bilər.
GBP
Ötən həftəyə 1.3320 səviyyəsində başlayan GBPUSD məzənnəsi 1.3430 həddinə kimi bahalaşsa da, bundan sonra bir qədər ucuzlaşdı və həftəlik şamını 1.3370 səviyyəsində tamamladı.
Cari həftə ərzində İngiltərədə dərc olunacaq ÜDM-in həcmi və PMİ gösətəriciləri funt-sterlinqin dünya birjalarındakı qiymətlərinə ciddi təsir edə bilər.
“Buğalar” qiyməti 1.33$ həddinin üzərində qoruyub saxlaya bilsələr, artım tendensiyası davam edə bilər.
OİLUK
Ötən həftəyə 74.90$ səviyyəsində başlayan “Brent” nefti (OİLUK) həftə ərzində 76$-a kimi bahalaşsa da, S.Ərəbistanının itirdiyi bazarları geri qaytarmaq üçün neft hasilatını artıracağına dair açıqlamasından sonra neft yenidən ucuzlaşdı və həftəni 72.80$-da başa vurdu.
OİLUK-də “buğalar” qiyməti 75$-ın üzərində qaytara bilməsələr, eniş tendensiyası daha da dərinləşə bilər.
XAUUSD
Ötən həftəyə 2618.60$ həddində start verən qızıl növbəti dəfə tarixi maksimumlarını yenilədi. Ən son 2685.50$ həddini test etdikdən sonra, geriləyən “sarı metal” həftəlik şamını 2659.80$ həddində tamamladı.
“Buğalar” qiyməti 2630$ həddinin üzərində qoruyub saxlaya bilsələr, artım tendensiyası daha kəskin xarakter ala bilər.
İnvestisiya ilə bağlı suallarınızı: *1234 telefon nömrəsi və ya www.investaz.az veb saytı vasitəsilə bizə ünvanlaya bilərsiniz.
“İNVEST-AZ İnvestisiya Şirkəti” QSC-nin
Tədris və Analiz Departamenti
“İNVEST-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikasının Mərkəzi Bankı tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.
__________________
Risk bildirişi.
Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İNVEST-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.
