1 oktyabr 2024-cü il tarixində Bakı Fond Birjasında Maliyyə Nazirliyinin üç illik (1092 gün) olan istiqrazlarının yerləşdirilməsi üzrə hərrac keçirilib.
Banker.az-ın əldə etdiyi xəbərə görə, istiqrazların ortaçəkili gəlirliyi 10.2515% olmaqla 2020-ci ilin iyulundan bu tərəfə maksimum yeniləyib. Sonuncu dəfə həmin ilin oktyabrında orta gəlirlilik 11-12% arasında idi.
Dövlət istiqrazlarına olan tələbin təklifdən az olması səbəbindən adətən investorlara cəlbedici olmaq üçün faizlər yüksəldilir. Göründüyü kimi, emitent Maliyyə Nazirliyi 150 milyon manat vəsait cəlb etmək istəyirdi və təkliflərin aşağı olması səbəbindən cəmi 100.27 mln. manat cəlbi reallaşıb.
Qeyd edək ki, Maliyyə Nazirliyi dövlət istiqrazlarının gəlirliliyinin son illərdə yüksəlməsini pul bazarındakı likvidliklə əlaqələndirib.
İstiqrazların buraxılışı üzrə məlumatlar aşağıdakı kimidir:
| Emitent | Azərbaycan Respublikasının Maliyyə Nazirliyi |
| Dövlət istiqrazının növü | Kuponlu, ortamüddətli dövlət istiqrazları |
| Dövlət qeydiyyat nömrəsi – İSİN | AZ0201070262 |
| İstiqrazların tədavül müddəti | 1092 gün |
| Buraxılış həcmi | 150,000,000 manat |
| Nominal dəyəri | 100 manat |
| Minimal qiymət | 85.6547 (13.4700%) manat |
| Maksimal qiymət | 94.6362 (9.6000%) manat |
| Kəsmə qiyməti | 92.2793 (10.5700%) manat |
| Ortaçəkili qiyməti | 93.0449 (10.2515%) manat |
| Reallaşdırılmış həcmi | 100,273,600 manat |
| Sifarişlərin Ümumi həcmi (nominal qiymətlə) | 128,498,800 manat |
| İnvestor sayı | 20 |
| Sifarişlərin sayı | 40 |
| Ödəmə tarixi | 28.09.2027 |
| Anderrayter | “PAŞA Kapital İ.Ş.” QSC |
