2025-ci ilin yanvar-iyun aylarında “Bank of Baku” ASC-nin xalis mənfəəti ötən ilin eyni dövrü ilə müqayisədə 28.4% artaraq 14.1 milyon manata çatıb.
Banker.az bunu bankın yarımillik hesabatına istinadən xəbər verir.
Bankın faiz gəlirləri 14.7% artaraq 83.6 milyon manata yüksəlib. Gəlirlərin əsas hissəsi – 79.3 milyon manatı müştərilərə verilmiş kreditlərdən formalaşıb və bu göstərici illik müqayisədə 16.6% artım göstərib.
Faiz xərcləri 18.6% artaraq 32.1 milyon manata çatıb. Ən böyük xərclər depozitlər üzrə faizlərə düşüb – bu xərc 20% artaraq 30.4 milyon manat təşkil edib. Nəticədə, bankın xalis faiz gəliri 12.5% artaraq 51.5 milyon manat olub.
Qeyri-faiz gəlirləri isə 8.6 milyon manat təşkil edib. Bu kateqoriyada alınan haqq və komissiya gəlirləri 19.6% artaraq 9.3 milyon manata yüksəlib.
Qeyri-faiz xərcləri 3% artaraq 41.3 milyon manata çatıb. Əməkhaqqı və digər kompensasiya xərcləri 11.7% artaraq 17.1 milyon manat, amortizasiya xərcləri isə 2.3% artaraq 1.3 milyon manat təşkil edib. Digər xərclər demək olar ki, ötən illə eyni səviyyədə qalıb.
Bank mümkün zərərlər üçün yaradılmış ehtiyatları azaltdığı üçün 196 min manatlıq azadolma qeydə alıb.
