Bu il OpenAI artıq təxminən 1 trilyon dollarlıq hesablama gücü üçün müqavilələr imzalayıb. Cəmi bir həftə əvvəl şirkətin dəyəri 500 milyard dollar səviyyəsində qiymətləndirildi və bu da onu dünyanın ən bahalı özəl şirkət etmişdir.
Amma ChatGPT-nin yaradıcısı hələ qazandığından qat-qat çox xərcləyir və üzərinə yeni öhdəliklər götürür. “Bu qədər pulu haradan alır?” sualına isə OpenAI ambisiyalı planlarla cavab verir: Sem Altman dünyanın dörd bir yanından investorlar axtarır, komandası isə ChatGPT-ni Etsy-də satış etməyi və Booking ilə Spotify-a inteqrasiya olmağı öyrədir.
Investorların sualı
Son günlər OpenAI haqqında daha bir böyük xəbər yayıldı: şirkət AMD-nin süni intellekt çiplərinə on milyardlarla dollar xərcləməyə hazırlaşır. Bu razılaşma ilə birlikdə OpenAI-nin il ərzində imzaladığı hesablama müqavilələrinin ümumi dəyəri təxminən 1 trilyon dollara çata bilər.
Söhbət 20 giqavatt gücdən gedir — müqayisə üçün, bu, təxminən 20 nüvə reaktorunun istehsal etdiyi enerji qədərdir. OpenAI rəhbərliyinin hesablamalarına görə, hər bir giqavatt hesablama gücü təxminən 50 milyard dollara başa gəlir. Yəni sadə riyazi hesablama belədir:
20 GW × 50 mlrd $ = 1 trilyon $, — Financial Times.
Analitiklərin fikrincə, bu daha çox “necə olsa, çıxış yolu taparıq” prinsipi ilə riskli oyun təsiri bağışlayır. Amma OpenAI və onun tərəfdaşları inanır ki, süni intellekt bir gün internet və ya smartfon qədər gündəlik həyatın ayrılmaz hissəsinə çevriləcək.
Hazırda isə ChatGPT-nin gəlirləri bu planlarla müqayisədə çox kiçikdir. Proqnozlara görə, OpenAI bu ili təxminən 10 milyard dollar zərərlə başa vuracaq. Şirkət ümid edir ki, gəlirlər sürətlə artdığı üçün bu zərəri 8,5 milyard dollara endirə biləcək. İlk altı ayda gəlir 4,3 milyard dollar təşkil edib (bu, ötən ilin ümumi gəlirindən 16% çoxdur), ilin sonuna qədər isə 13 milyard dollara çatdırılması planlaşdırılır.
Yeni “Facebook”
Xoş xəbərlər də var: ChatGPT-nin populyarlığı sürətlə artır. Həftəlik aktiv istifadəçilərin sayı artıq 800 milyon nəfəri, OpenAI texnologiyası əsasında məhsul hazırlayanların sayı isə 4 milyonu keçib.
Şirkət indi yeni gəlir mənbələri axtarır — məsələn, ChatGPT daxilində reklam yerləşdirməyə hazırlaşır. Bunun üçün ayrıca monetizasiya bölməsi yaradılır və hazırda bu sahəyə rəhbər axtarılır.
OpenAI həmçinin real alış-veriş funksiyasını da təqdim edib. ABŞ-da istifadəçilər artıq ChatGPT vasitəsilə Etsy-dən məhsul ala bilirlər, saytı tərk etmədən. Gələcəkdə bu imkanın Shopify kimi digər platformalara da genişləndirilməsi planlaşdırılır.
Bundan əlavə, DevDay konfransında OpenAI göstərdi ki, ChatGPT gələcəyin “əməliyyat sistemi”nə çevrilə bilər: indi üçüncü tərəf şirkətlər ChatGPT daxilində öz tətbiqlərini yarada biləcək. Hazırda bu funksiyadan Booking, Canva, Coursera, Figma, Expedia, Spotify və Zillow istifadə edir. Artıq ChatGPT-dən xahiş edib Spotify-da pleylist tərtib etdirmək və ya Booking-də otel bron etmək mümkündür (hazırda bu funksiya bir çox ölkələrdə aktiv deyil).
Platformer nəşri OpenAI-nin strategiyasını Facebook-un 2007-ci il addımı ilə müqayisə edir — o vaxt sosial şəbəkə API-ni açaraq platformaya çevrilmişdi. Bu, böyük uğur gətirmişdi, amma sonradan məlumat sızmaları ilə bağlı qalmaqallara yol açdı. OpenAI bildirir ki, tətbiqlər yalnız minimum zəruri məlumatlara çıxış əldə edəcək, amma istifadəçilərin söhbət tarixlərinə girişin hansı səviyyədə məhdudlaşdırılacağı hələ məlum deyil.
Növbəti addım nədir?
Əgər OpenAI-nin planı uğurlu olarsa, ChatGPT insanın internetdə etdiyi demək olar hər şeyi bir yerdə toplayan platformaya çevriləcək — artıq ayrı-ayrı sayt və proqramlara ehtiyac qalmayacaq.
Bu, şirkətin trilyonluq xərclərini əsaslandıran çox iddialı məqsəddir. Amma hələ də açıq sual qalır: OpenAI bunu gerçəkləşdirə biləcəkmi?
