ABŞ Senatı yenidən respublikaçılar tərəfindən təqdim olunan federal hökumətin maliyyələşdirilməsi haqqında qanun layihəsini təsdiqləyə bilməyib. Bu isə dövlət qurumlarının fəaliyyətinin qismən dayandırılmasının (şatdaun) davam etməsinə gətirib çıxarır. Son həftələrdə bu, artıq 11-ci uğursuz cəhddir: sənəd 60 səs əvəzinə cəmi 50 səs “lehinə” toplayıb.
Bundan əvvəl yuxarı palata demokratlar tərəfindən təqdim edilən oxşar qanun layihələrini də rədd etmişdi ki, bu da dərin siyasi dalana işarə edir. ABŞ prezidenti Donald Tramp uğursuzluqlara baxmayaraq, yaxın zamanda demokratların respublikaçıların qanun layihəsini dəstəkləyəcəyinə əmin olduğunu bildirib.
Hökumətin fəaliyyətinin qismən dayandırılması oktyabrın 1-də partiyalar arasında bir sıra xərclər maddələri üzrə fikir ayrılıqları səbəbilə başlayıb. Administrasiya hərbi qulluqçulara və hüquq-mühafizə orqanlarının əməkdaşlarına maaşların ödənilməsini davam etdirəcəyini vəd etsə də, Tramp əvvəlcədən mümkün ciddi ixtisarlar və işdən çıxarılmalar barədə xəbərdarlıq etmişdi. Hər iki tərəf böhranın uzanmasında bir-birini günahlandırmağa davam edir.
