ABŞ-nin maliyyə naziri Skott Bessent Çinlə aparılan danışıqlarda iştirak edən nümayəndə heyətinin üzvü olaraq bildirib ki, Vaşinqton və Pekin iki ölkə arasında mümkün ticarət sazişinin “çərçivəsini” hazırlayıblar. Bu saziş 1 noyabrda qüvvəyə minməsi gözlənilən Çin mallarına əlavə rüsumların tətbiqinin qarşısını almağa kömək edəcək.
“Prezident Tramp mənə 100%-lik tariflərlə bağlı təhdidlə güclü danışıqlar aləti verdi və hesab edirəm ki, biz bunun qarşısını almağa və digər məsələlərin müzakirəsini davam etdirməyə imkan verəcək əhəmiyyətli bir çərçivə sazişinə nail olduq”, — deyə cənab Bessent NBC-yə müsahibəsində bildirib.
Çin tərəfdən ABŞ ilə danışıqlarda iştirak edən Li Çengang təsdiqləyib ki, bu gün aparılan müzakirələr nəticəsində tərəflər bir neçə məsələ üzrə ilkin razılığa gəliblər. Bu razılaşmaya ticarət “atəşkəsinin” uzadılması, ABŞ tərəfinin israr etdiyi fentanil ilə mübarizə, həmçinin ixrac məhdudiyyətləri daxildir.
Danışıqlardan sonra ABŞ prezidenti Donald Tramp mümkün saziş barədə nikbinliyini ifadə edib. O hesab edir ki, sazişin bağlanması ehtimalı yüksəkdir və əlavə edib ki, tezliklə Çin sədri Si Cinpin ilə şəxsi görüşləri baş tutacaq.
Donald Tramp oktyabr ayının əvvəlində Çin mallarına 100%-lik rüsumların tətbiq ediləcəyini elan etmişdi. Cənab Tramp bunu ÇXR hakimiyyətinin nadir torpaq metalları üzərində nəzarətin artırılmasına dair qərarına cavab adlandırıb və bu addımı “mənəvi rüsvayçılıq” kimi dəyərləndirib.
