Cümə günü neft qiymətləri enib və ardıcıl üçüncü ay üzrə ucuzlaşma istiqamətində irəliləyir. Qiymət azalmasına ABŞ dollarının güclənməsi, Çində zəif iqtisadi göstəricilər və qlobal hasilatın artması təsir edib.
Banker.az xəbər verir ki, Brent markalı neft 0,55% ucuzlaşaraq 64,64 dollar/barel, WTI isə 0,71% azalaraq 60,14 dollar/barel olub. “ANZ” analitiklərinin qeyd etdiyinə görə, dolların möhkəmlənməsi əmtəə bazarlarında investor marağını azaldıb. FED sədri Cerom Pauellin dekabrda faiz endiriminin “qaranti olmadığını” deməsi də dolların güclənməsinə səbəb olub.
Rəsmi məlumatlara əsasən, Çində zavod fəaliyyəti oktyabrda yeddinci ay da azalıb. Analitiklərə görə, artan hasilat bu il tələbat artımını üstələyəcək və bu da qiymətlərə əlavə təzyiq yaradır. Brent və WTI üçün aylıq azalma təxminən 3% olacaq.
OPEC+ mənbələri bildirir ki, təşkilat dekabrda hasilatı cüzi artırmağa hazırlaşır. Səkkiz üzv ölkə artıq gündəlik hasilat planını 2,7 milyon barrel yüksəldib. Eyni zamanda, Səudiyyə Ərəbistanının avqust ixracı son altı ayın maksimumuna – günlük 6,4 milyon barrelə çatıb. ABŞ-da isə hasilat günlük 13,6 milyon barrel səviyyəsində rekord qırıb.
ABŞ prezidenti Donald Tramp Çinin Alyaskadan enerji məhsulları almağa razılaşdığını açıqlasa da, analitiklər bunun ABŞ enerji ixracına ciddi təsir göstərəcəyinə şübhə ilə yanaşırlar.
