“Dubai Airshow 2025” aviasalonunda Hindistana məxsus “Tejas” qırıcısı qəzaya uğrayıb, bu barədə “Associated Press” məlumat yayıb. Hadisə nümayiş uçuşu zamanı baş verib.
Bir neçə gün əvvəl “X”də Dubay aviaşousunda “Tejas” qırıcılarından birində yanacaq sızması ilə bağlı məlumatlar yayılmışdı. Buna səbəb təyyarədən yanacaq axdığı iddia edilən videolar olmuşdu.
Hindistan Müdafiə Nazirliyi bu məlumatı təkzib edərək əsassız təbliğat adlandırmışdı. Nazirlik bildirmişdi ki, videoya düşən görüntü Dubayın iqlim şəraiti üçün standart prosedurdur və təyyarənin ekoloji nəzarət sistemindən və bort oksigen generasiya sistemindən “kondensatın qəsdən boşaldılması”nı əks etdirir.
“Tejas” — Hindistanın “Hindustan Aeronautics Limited” (HAL) şirkəti tərəfindən istehsal olunan dördüncü nəsil yüngül çoxməqsədli qırıcıdır. O, havadan hücum dəstəyi və quru əməliyyatların döyüş təminatı üçün nəzərdə tutulur. “Reuters” qeyd edir ki, bu qırıcılar Hindistan üçün aviaparkın yenilənməsi və Çin və Pakistanın güclənməsi fonunda xüsusi əhəmiyyət daşıyır.
Hindistan Hərbi Hava Qüvvələrinin qərargah rəisinin müavini Narmdeşvar Tivari bildirmişdi ki, ölkə “Tejas” təyyarəsinə xarici idxalçılar tərəfindən böyük maraq gözləyir. “Tejas burada idi və iştirak edirdi. Marağın ölçüsü böyük idi. Biz gözləyirik ki, builki sərgi təkcə yerli sakinlərin deyil, ziyarətçilərin də böyük gözləntilərini doğruldacaq və təyyarənin imkanlarını nümayiş etdirəcək”, — deyə o, faciədən əvvəl demişdi.
“Dubai Airshow 2025” — iki ildən bir keçirilən aerokosmik və müdafiə sənayesi sərgisidir. Burada təxminən 115 ölkədən 1,5 minə yaxın şirkət iştirak edir.
