Azərbaycan Prezidenti İlham Əliyev infrastruktur investisiyalarının idarə edilməsi üzrə fond olan “Global Infrastructure Partners”in (GIP, “BlackRock”a məxsusdur) qurucusu Adebayo Oqunlesi ilə görüşüb. O bildirib ki, fond enerji keçidi, nəqliyyat və rəqəmsal infrastruktur sahələrində əməkdaşlıqda maraqlıdır.
İlham Əliyev Azərbaycan Dövlət Neft Fondunun GIP ilə tərəfdaşlığını yüksək qiymətləndirib. Adebayo Oqunlesi qeyd edib ki, GIP-in aeroportların idarə edilməsinin optimallaşdırılması, logistika və nəqliyyat dəhlizləri, həmçinin enerji, o cümlədən bərpa olunan enerji sahələrində böyük təcrübəsi var.
Tərəflər GIP-in infrastruktur sahələrindəki layihələri barədə fikir mübadiləsi aparıblar. Həmçinin, prezidentin mətbuat xidmətinin məlumatına görə, süni intellekt texnologiyalarının tətbiqi üzrə beynəlxalq təşəbbüslər çərçivəsində əməkdaşlıq məsələləri müzakirə olunub.
GIP 2006-cı ildə yaradılıb, 2024-cü ildə isə “BlackRock” tərəfindən satın alınıb. Hazırda fond təxminən 189 milyard dollar dəyərində aktivləri idarə edir. “BlackRock”un idarə etdiyi aktivlərin ümumi həcmi isə 14 trilyon dollardır.
