Azərbaycan iqtisadiyyatı 2025-ci ildə qlobal neft qiymətlərinin aşağı düşməsinə baxmayaraq müsbət artımı qoruyub saxlayıb.
Bu barədə “Moody’s Ratings” beynəlxalq reytinq agentliyindən bildirilib.
Qeyd edilib ki, lakin artım tempi 2024-cü illə müqayisədə zəifləyib. İlk on bir ayda real ÜDM illik müqayisədə 1,6% artıb və tam il üzrə artımın təxminən 1,5% olacağı gözlənilir. Bu göstərici qeyri-neft sektorundakı dayanıqlılığın neft-qaz sektorundakı davam edən daralmanı qismən kompensasiya etməsini əks etdirir.
Moody’s hesab edir ki, neft qiymətlərinin yumşalması və xərclərin artması 2025-ci ildə konsolidə edilmiş fiskal profisitin (buraya Naxçıvan regionu, sosial fondlar və SOFAZ daxil olmaqla) ÜDM-in təxminən 2,4%-nə enməsinə səbəb olacaq. Bu göstərici 2024-cü ildə 4% təşkil etmişdi. Dövlət büdcəsində infrastruktur, bərpa və sosial proqramlara xərclərin sürətlənməsi fonunda yüngül kəsir formalaşa bilər.
