JPMorgan son günlər bazarda müşahidə olunan kəskin enişə baxmayaraq, qızılın qiymətinin 2026-cı ilin sonuna qədər unsiya üzrə $6300-a çatacağını proqnozlaşdırır. Deutsche Bank analitikləri isə qızıl üzrə proqnozlarını $6000 səviyyəsində təsdiqləyiblər. Onların fikrincə, qiymətli metalın kotirovkalarını investorların və mərkəzi bankların ABŞ dollarından asılılığı azaltmaq istəyi dəstəkləyəcək. Hazırda isə spot bazarda qızılın qiyməti $4800 ətrafındadır.
JPMorgan analitikləri bildiriblər ki, mərkəzi banklar və investorlar tərəfindən formalaşan tələbin təsiri ilə qızılın qiyməti 2026-cı ilin sonuna qədər unsiya üzrə $6300-a qədər yüksələ bilər. Reuters yazır ki, bu barədə bankın analitik qeydinə istinad edilir.
Analitiklərin sözlərinə görə, onlar orta müddətli perspektivdə qızılın dəyərinin artacağına “qəti şəkildə əmindirlər” və bu mövqeni investor portfellərində aktivlərin diversifikasiyasına doğru “aydın, struktur xarakterli və davam edən” meyl ilə əsaslandırırlar. JPMorgan hesab edir ki, real aktivlərin gəlirliliyinin maliyyə alətləri ilə müqayisədə “dayanıqlı şəkildə” üstün qalması bu tendensiyanın davam etməsinə şərait yaradacaq. Bankın proqnozuna görə, 2026-cı ildə dünya mərkəzi bankları ümumilikdə 800 ton qızıl alacaq.
The Wall Street Journal yazır ki, Deutsche Bank analitikləri də qızılın qiymətinin 2026-cı ilin sonuna qədər unsiya üzrə $6000-a yüksələcəyini gözləyirlər. Bankın analitiki Maykl Syue qiymətli metallar bazarındakı hazırkı volatilliyi qızıl üzrə genişmiqyaslı satışların başlanğıcı hesab etmir. Onun fikrincə, qızılın qiymətini fundamental amillər dəstəkləməyə davam edəcək. Bunlara investorların və mərkəzi bankların aktivləri diversifikasiya etməsi, dollar asılılığını azaltmaq istəyi, eləcə də xüsusilə Asiyada fərdi investorlar tərəfindən yüksək tələb daxildir.
Yanvarın 30-u, cümə günü qızıl bazarı son on ilin ən böyük enişini yaşayıb və qiymətlər 9% düşüb. Fevralın 2-də kəskin eniş davam edib və minimum nöqtədə spot qiymət $4402,38-ə qədər geriləyib. Bu göstərici yanvarın 29-da qeydə alınmış tarixi maksimum — $5595,46 səviyyəsindən təxminən 27% aşağıdır.
