“Gartner”in proqnozuna görə, qlobal IT xərcləri 2026-cı ildə 6,15 trilyon dollara yüksələcək ki, bu da 2025-ci illə müqayisədə 10,8% çoxdur. Analitiklər hesab edirlər ki, “süni intellekt köpüyü” ilə bağlı narahatlıqlara baxmayaraq, AI infrastrukturunun artımı yüksək templə davam edir və xərclər həm proqram təminatı, həm də AI avadanlıqları seqmentində artır. Bu barədə “HPCwire” məlumat yayıb.
“ServerNews”un yazdığına görə, hiperskeyl səviyyəli bulud provayderlərinə tələbat AI serverlərinə yatırımların əsas hərəkətverici qüvvəsi olaraq qalır. Gözlənilir ki, 2026-cı ildə serverlərə xərclər daha da sürətlənəcək və illik artım 36,9% təşkil edəcək. Məlumat mərkəzlərinə (data mərkəzləri) ümumi xərclərin isə 31,7% artaraq 650 milyard dolları keçəcəyi proqnozlaşdırılır.
2026-cı ildə proqram təminatına xərclərin artım proqnozu bir qədər aşağı — 15,2%-dən 14,7%-ə endirilib. Bu həm tətbiqi, həm də infrastruktur proqram təminatına aiddir. Bununla belə, şirkət hesab edir ki, ümumi proqram təminatı xərcləri 1,4 trilyon dollardan yuxarı qalacaq. Generativ süni intellekt modellərinə xərclərin artım proqnozu isə dəyişməyib və 80,8% səviyyəsində qalır. Generativ modellərin davamlı artımı nəticəsində onların proqram təminatı bazarındakı payının 2026-cı ildə daha 1,8% yüksələcəyi gözlənilir.
Smartfonlar, fərdi kompüterlər və planşetlər daxil olmaqla cihazlara çəkilən xərclərin 2026-cı ildə 836 milyard dollara çatacağı proqnozlaşdırılır.
