Amerikanın investisiya şirkəti “General Atlantic” Çin şirkəti “ByteDance”nin səhmlərini satır. “Reuters” mənbələrə istinadən yazır ki, sövdələşmə çərçivəsində şirkətin ümumi dəyəri 550 milyard dollar səviyyəsində qiymətləndirilir.
Mənbələrdən birinin bildirdiyinə görə, “General Atlantic” son həftələrdə öz payının bir hissəsinin satış prosesinə başlayıb və mart ayında onu yekunlaşdırmağı planlaşdırır. Sövdələşmənin maliyyə şərtləri, investisiya şirkətinin “ByteDance”dəki payının həcmi və satışa çıxarılan səhmlərin dəqiq miqdarı açıqlanmır.
Bu, ABŞ-nin yanvar ayında “ByteDance”nin “TikTok”un Amerika biznesindən çıxışı ilə bağlı şərtləri təsdiqləməsindən sonra şirkət səhmlərinin ilk satışıdır.
Ötən il “ByteDance” səhmlərinin geri alınmasını həyata keçirmiş və həmin vaxt şirkətin ümumi dəyəri 330 milyard dollardan çox qiymətləndirilmişdi. “Reuters” mənbələrinin məlumatına görə, noyabr ayında ikinci bazarda səhmlərin satışı çərçivəsində şirkətin dəyəri 480 milyard dollar səviyyəsində qiymətləndirilib.
“General Atlantic” 2017-ci ildə “ByteDance”nin kapitalına daxil olub. Həmin vaxt şirkətin dəyəri təxminən 20 milyard dollar idi. Ötən il “ByteDance” rüblük gəlir göstəricilərinə görə ABŞ-nin “Meta” şirkətini geridə qoyaraq sosial şəbəkələr seqmentində dünyanın ən böyük şirkətinə çevrilib.
Daha əvvəl bildirilmişdi ki, “ByteDance” videooyun tərtibatçısı “Shanghai Moonton Technology”nin Səudiyyə Ərəbistanının “Savvy Games Group” şirkətinə satışı ilə bağlı danışıqlar aparır.
Agentlik mənbələrinin məlumatına görə, sövdələşmənin məbləği 6–7 milyard dollar təşkil edə bilər.
