3 trilyon dollardan çox vəsaiti idarə edən Capital Group-un baş icraçı direktoru Mayk Gitlin Z nəslinə “hobbi-investisiya” yanaşmasını unutmağı tövsiyə edir. Söhbət zumerlərin sadəcə xoşlarına gəldiyi aktivlərə, şirkətlərə və ya mövzulara pul yatırmasından gedir.
Bunun əvəzinə Gitlin, xammal bazarında ticarətdən uzaq duran belə investorları uzunmüddətli perspektiv barədə düşünməyə çağırıb.
22 aprel, çərşənbə günü Sinqapurda keçirilən CNBC Converge Live konfransında auditoriyanın sualını cavablandıran Gitlin bildirib ki, gənc investorlar bazarlara sərvət yaratmağa yönəlmiş uzunmüddətli düşüncə ilə yanaşmalıdırlar, “şəxsi maraqları portfelə əlavə edib hobbi kimi investisiya etməklə” yox.
Sualı auditoriyadakı atalardan biri verib. O deyib ki, yeniyetmə övladları onun qızıldan neftə keçmək planına etiraz ediblər və bunu “müharibədən qazanc götürmək” adlandırıblar. O əlavə edib ki, uşaqlarının məktəbində apardığı qeyri-rəsmi sorğu göstərib ki, Z nəslindən olan həmyaşıdlarının təxminən 80%-i eyni cür tərəddüd edir.
Gitlin bildirib ki, söhbət istər qızıldan, istərsə də neftdən getsin, “növbəti 75 il üçün pullarını necə yatıracaqlarını düşünəndə, onların fikirləşməli olduğu əsas şey bunlar deyil. Əmtəə bazarlarında vaxtı düzgün tutmağa çalışmaq peşəkarlar üçün belə çox, çox çətindir, 13 yaşlı uşaqlardan isə heç danışmağa dəyməz. Onların diqqətini daha geniş bazarlara yönəldin”.
Bu baxımdan o, gənc investorları bir neçə səhmdən ibarət “kağız portfel” formalaşdırmağa, süni intellekt alətlərinin köməyi ilə hərtərəfli araşdırma aparmağa və bazar dalğalanmalarına yox, fundamental göstəricilərə fokuslanmağa çağırıb.
“Onların diqqətini səhmlərə və istiqrazlara, ümumilikdə makroiqtisadi şəraitə, dünyada baş verənlərə yönəldin”, — Gitlin əlavə edib.
Bu açıqlamalar tədqiqatçıların gənc investorlar arasında dərinləşən məyusluq və sərvət idarəçiliyi institutlarına artan inamsızlıq kimi təsvir etdiyi bir fonda səslənib.
Dünya İqtisadi Forumunun pərakəndə investorlarla bağlı qlobal sorğusuna əsasən, son iki ildə Z nəslinin ənənəvi maliyyə institutlarına inamı azalıb. İnvestisiya etməyənlərin təxminən 20%-i isə bazarlarda ümumiyyətlə iştirak etməmələrinin səbəbi kimi məhz maliyyə institutlarına etimadsızlığı göstərib.
Kiçik, amma getdikcə böyüyən bir investor qrupu isə “maliyyə nihilizmi” adlandırılan yanaşmanı seçir, yəni sərvət yaratmağın ənənəvi üsullarından tamamilə imtina edir.
