JPMorgan Private Bank-dan Qreys Piters hesab edir ki, qlobal iqtisadi parçalanma, süni intellekt və inflyasiya hazırda bazarların hərəkətini müəyyən edən əsas qüvvələrə çevrilib. Onun sözlərinə görə, Yaxın Şərqdəki müharibə sadəcə artıq mövcud olan tendensiyanı daha da gücləndirib: şirkətlər və dövlətlər qeyri-sabit regionlardan və xarici təchizatçılardan asılılığı azaltmaq üçün enerji, istehsal, infrastruktur və öz təchizat zəncirlərinə daha çox yatırım edirlər.
“İnvestorlar xəbər başlıqlarına həddindən artıq emosional reaksiya verməməlidirlər, amma dərin struktur dəyişikliklərini də kiçiltmək olmaz”, — Piters bildirib. Onun fikrincə, səhmlər bazarı maksimumlara yaxın səviyyələrdə ticarət olunsa da, qiymətləndirmələr əsas hərəkətverici qüvvə kimi kapital xərclərinin artımı nəzərə alındıqda əsaslı görünür.
Şirkətlər süni intellektə yönələn investisiyalardan əlavə, digər istiqamətlər üzrə də göstəricilərin 12% artdığını açıqlayıblar. Piters hesab edir ki, bu, struktur xarakterli dəyişiklikdir: şirkətlər qısamüddətli artım üçün yox, milli təhlükəsizliklə bağlı tapşırıqlar fonunda iqtisadiyyatın uzunmüddətli yenidən qurulması çərçivəsində investisiyaları artırırlar.
JPMorgan nəyə üstünlük verir
İnkişaf etməkdə olan bazarlar JPMorgan-ın ilin ikinci yarısı üçün əsas investisiya ideyalarından biri olaraq qalır. Piters xammala, minerallara və texnoloji təchizat zəncirinə tələbatdan faydalanan ölkələri önə çəkir. Burada ilk növbədə Cənubi Koreya və Tayvan qeyd olunur. Onun sözlərinə görə, Çin son beş ildə geri qalsa da, mühüm üstünlüyə malikdir — süni intellektin inkişafı üçün kritik əhəmiyyət daşıyan güclü enerji infrastrukturu.
Piters eyni zamanda xəbərdarlıq edir ki, kapital xərclərinin artması inflyasiyanı sürətləndirə bilər. Portfeli qorumaq üçün o, qızıl kimi müdafiə aktivlərinin saxlanılmasını və qısa müddətli istiqrazlara üstünlük verilməsini tövsiyə edir. Bununla yanaşı, investisiya bankı korporativ mənfəətlər üzrə optimist mövqeyini qoruyur: gözlənilir ki, yaxın illərdə artım əvvəlki onilliklərlə müqayisədə daha yüksək olacaq. Bu artımın əsas mənbələri kapital yatırımları və süni intellekt sayəsində marjanın yaxşılaşmasıdır. JPMorgan-ın favoritləri sırasında ABŞ səhmləri, sənaye və maliyyə sektoru da var.
“Artıq nə inflyasiya, nə də geosiyasət müvəqqəti hadisə kimi görünür”, — Piters vurğulayır. Onun sözlərinə görə, davamlı sarsıntılar portfelin həm regionlar, həm də sektorlar üzrə diversifikasiyasını zəruri edir.
