Bu il gözlənilən SpaceX, OpenAI və Anthropic kimi süni intellekt nəhənglərinin yerləşdirmələri ərəfəsində ilin ən böyük IPO-su Kaliforniyada yerləşən süni intellekt çipləri istehsalçısı Cerebras Systems-ə məxsus olub.
Şirkət planlaşdırılan 4,8 milyard dollar əvəzinə 5,55 milyard dollar cəlb edib. Cerebras 40 milyard dollar dəyərləndirmə ilə bazara çıxıb və sifarişlər təklifi 20 dəfə üstələyib. Şirkətin dəyəri bir ildən də az müddətdə beş dəfə artıb: sentyabrda keçirilən son investisiya raundu zamanı onun qiymətləndirilməsi 8,1 milyard dollar idi.
Bu hansı şirkətdir?
Əvvəla, Cerebras “ənənəvi” istehsalçı deyil. Şirkət demək olar ki, bütün rəqiblərdən fərqli olaraq ayrıca çiplər yox, bir böyük lövhə üzərində minlərlə süni intellekt prosessoru yerləşdirmək prinsipi ilə işləyir.
Belə fiziki arxitektura inferens tapşırıqlarında enerji sərfini azaltmağa və hesablama gücünü artırmağa imkan verir. Şirkət iddia edir ki, onun CS-3 sistemi Nvidia-nın B200 Blackwell platforması əsasında qurulan sistemdən 21 dəfə sürətlidir. Amma eyni zamanda Cerebras miqyaslama, yararlı məhsul çıxışı, qiymət və spesifik proqramlaşdırma mühiti baxımından çətinliklərlə üzləşir.
Buna baxmayaraq, şirkət fizika və biokimya üzrə qabaqcıl simulyasiyalar nişində möhkəmlənə bilib. Keçən ilə qədər onun iki əsas müştərisi var idi və hər ikisi BƏƏ-dən idi — G24 qrupu və Şeyx Məhəmməd ibn Zayed adına Süni İntellekt Universiteti.
Ötən il isə şirkət OpenAI-dən data mərkəzləri üçün server sifarişi alıb. Bu sifarişin həcmi 20 milyard dollar olub. Bundan əlavə, OpenAI Cerebras-a 1 milyard dollarlıq əməliyyat krediti də verib. Şirkət həmçinin Amazon Web Services, Meta və bir neçə süni intellekt startapı ilə tərəfdaşlıqlar qurub. IPO-dan bir neçə həftə əvvəl isə Masayoşi Sonun SoftBank-ı Arm Holdings vasitəsilə Cerebras-ı almaq istəyirdi.
2025-ci ildə Cerebras 510 milyon dollar gəlir fonunda 146 milyon dollar əməliyyat zərəri qeydə alıb.
Bunun mənə nə aidiyyəti var?
Cerebras-ın rekordu uzun çəkməyəcək, amma bu IPO bir daha göstərir ki, hazırda investorlar süni intellektlə bağlı demək olar ki, istənilən şirkəti almağa hazırdırlar. Sənayedə ilk həqiqi meqa-yerləşdirmə isə SpaceX-in IPO-su olmalıdır. Bu yerləşdirmə ilə bağlı çoxsaylı suallar barədə biz texnologiya bülletenlərimizin birində artıq yazmışdıq.
Gələn həftə, mayın 19-da SpaceX üçün çox vacib mərhələ gözlənilir — Starship-in üçüncü versiyasının ilk uçuşu. Orbital data mərkəzləri konsepsiyasının gələcəyi də böyük ölçüdə məhz bu buraxılışdan asılı olacaq.
