Bank of America strateqləri EPFR Global tədqiqat şirkətinin məlumatlarına istinadla bildirirlər ki, iyunun 17-də başa çatan həftə ərzində ABŞ səhm fondlarına rekord 119.2 milyard dollar daxil olub.
İllik ifadədə ABŞ səhm fondlarına kapital axınının 739 milyard dollarla rekord səviyyəyə çatacağı gözlənilir. Əsas hərəkətverici qüvvə texnologiya sektoru olaraq qalır: texnologiya səhmlərinə həftəlik vəsait axını tarixi maksimuma — 19.2 milyard dollara yüksəlib.
Kapital yalnız ən iri şirkətlərə yönəlməyib:
➖ ABŞ-nin orta kapitallaşmalı şirkətlərinə yatırım edən fondlar bir həftə ərzində rekord 19.9 milyard dollar cəlb edib.
➖ Kiçik kapitallaşmalı şirkətlərə yatırım edən fondlara isə 12.3 milyard dollar daxil olub. Bu, tarixdə ikinci ən yüksək göstəricidir.
İranla müharibənin başa çatması və Amazon, Meta və Alphabet kimi hipermiqyaslı texnologiya şirkətlərinin süni intellekt infrastrukturu üçün iri həcmli xərcləri ABŞ bazarını yeni zirvələrə yüksəldib.
Nasdaq 100 indeksi ilin əvvəlindən 24%, S&P 500 isə 9.6% artıb. ABŞ ev təsərrüfatlarının səhmlərdəki ümumi sərvəti bu il 6 trilyon dollar yüksəlib.
Bu niyə vacibdir?
ABŞ bazarı qlobal kapitalı yenidən texnologiya sektoru ətrafında cəmləşdirir.
Kapital axını yeni yerləşdirmə dalğası ilə üst-üstə düşüb: SpaceX tarixdə ən böyük IPO-nu həyata keçirib, Anthropic və OpenAI-ın da onun ardınca gedə biləcəyi gözlənilir.
Eyni zamanda Alphabet, Meta və Oracle süni intellekt xərclərini maliyyələşdirmək üçün səhmlər satırlar. Bu, investor marağının hələlik bazara çıxarılan böyük həcmdə yeni səhmləri belə qəbul edə bildiyini göstərir.
Digər regionlarla fərq isə daha da artır. Avropa fondlarından vəsait axını artıq ardıcıl 10 həftədir davam edir, Çin fondlarından isə 12 həftədir pul çıxır.
Bununla belə, BofA siyasi risk barədə xəbərdarlıq edir. Respublikaçılar noyabrda Senata nəzarəti itirsələr, bu, “dolların, istiqraz gəlirliliklərinin və səhmlərin kəskin ucuzlaşmasına” səbəb ola bilər.
“Trampın reytinqi sentyabra qədər yüksəlməsə, bazardakı optimist investorlar narahat olmağa başlayacaqlar”, — strateqlər yazırlar.
Hələlik isə bazarda eyforiya hökm sürür. Əsas sual bunun nə qədər davam edəcəyidir.
