HSBC Holdings Plc-nin analitiki Maks Kettner investorlara hesabat mövsümündən sonra portfellərində səhmlərin payını azaltmağı tövsiyə edir. Onun fikrincə, qeyri-sabit bazar əhval-ruhiyyəsi, fiskal siyasətin dəstəyinin zəifləməsi və ABŞ-də aralıq seçkilərlə bağlı qeyri-müəyyənlik bazarda korreksiyaya səbəb ola bilər.
Martın ortalarından etibarən səhmlərə maksimum üstünlük verən Kettner qeyd edib ki, hazırkı vəziyyət 2021-ci ildə iqtisadiyyatın bərpası dövrünü xatırladır. Bununla belə, ABŞ-də kredit kartları üzrə məlumatlar istehlak xərclərinin azaldığını göstərir.
Miqyasına görə 2009-cu il maliyyə böhranının nəticələrinin aradan qaldırılması üçün görülmüş tədbirlərlə müqayisə edilən “Böyük gözəl qanun layihəsi” çərçivəsində fiskal stimullar əsasən 2026-cı ilin birinci yarısında cəmləşib. Bu isə gələcəkdə iqtisadiyyata əlavə dəstək göstərilməsi üçün imkanları məhdudlaşdırır.
HSBC-nin multiaktiv investisiyalar üzrə baş strateqi Kettner Bloomberg Television-a müsahibəsində bildirib ki, aralıq seçkilər ərəfəsində və təxminən bir ay–bir ay yarımdan sonra başlayacaq hesabat mövsümündən sonra investorlar ehtiyatlı davranmalıdırlar.
Aralıq seçkilərlə bağlı risklərdən danışan Kettner Senatda tərəflərin şanslarının bərabər olduğunu göstərən sorğulara diqqət çəkib. Onun sözlərinə görə, bu vəziyyət süni intellekt və məlumat mərkəzlərinin tənzimlənməsi ilə bağlı qeyri-müəyyənlik yaradır və texnologiya sektoruna əhəmiyyətli təsir göstərə bilər. Bununla belə, Kettner mümkün korreksiyanı alış üçün fürsət hesab edir.
Kettner bunun “ayı bazarı”nın başlanğıcı olduğunu düşünmür. Lakin mövsümi amilləri və bazardakı hazırkı mövqeləri nəzərə alaraq, aralıq seçkilərdən əvvəl səhmlərdə 5–10%-lik korreksiyanın tamamilə mümkün olduğunu hesab edir. Onun fikrincə, seçkilərdən sonra yenidən alış üçün əlverişli vaxt yarana bilər.
Yaxın perspektivdə Kettner iri texnologiya şirkətlərinə üstünlük verməyə davam edir. O hesab edir ki, bu şirkətlərin gözləntiləri üstələməsi üçün modernləşdirməyə əlavə kapital xərclərindən yayınmaları və ya mənfi pul axınının olmadığını göstərmələri kifayət edə bilər.
